Almatyda qozǵalysty júıeleıtin portal iske qosylady
ALMATY. QazAqparat –Almatyda tótenshe jaǵdaı kezinde jumys isteıtin kásiporyn qyzmetkerlerine qalada júrýge ruqsat beretin jańa portal iske qosylady. Bul týraly qala ákiminiń orynbasary Saparbek Tuıaqbaev brıfıngi barysynda málim etti, dep habarlaıdy QazAqparat tilshisi.
Onyń aıtýynsha, saıt 14 sáýirde iske qosylady.
«Megopolıstegi qozǵalysty júıelendirý úshin jedel shtabtyń sheshimimen jańa portaldy iske qosamyz. Erteńnen bastap kásipkerlerden usynystar qabyldanady. Negizi bul portal júıeli túrde bizdiń derekter qoryna aqparat jınaıdy. Buǵan deıingi derekter qorynan biraz adamdardyń negisiz ruqsat alǵany anyqtaldy. Sondyqtan ony qaıta júılendirýge týra keldi»,– deıdi Saparbek Tuıaqbaev.
Onyń aıtýynsha, portaldyń ereksheligi árbir kásipker eshqandaı adamnyń qatysýynsyz-aq elektrondyq tsıfrlyq qoltańba arqyly usynys bere alady.
«Ol jerde kásipker óz jumysshylarynyń jáne avtokólikterdiń tizimin usynady. Eger ol aqparat ruqsat etilmegen salada bolsa, portal ony ótkizbeıdi. Bul onyń basty ereksheligi jáne bári eshbir adamnyń qatysýynysyz jasalady. Eger kásipker Memlekettik kirister departamenti jáne basqa da memlekettik organdarǵa bergen esepterinde kórsetilgen qyzmetkerlerden sany kóp bolsa oǵan shekteý qoıylyp, ótkizbeı qoıady», –dep tolyqtyrdy Almaty qalasy ákiminiń orynbasary.
Sondaı-aq, ol bul sharanyń barlyǵy koronavırýstyń halyq arasyna taralýyna jol bermeý turǵysynda adamdardyń júrisin shekteýge baǵyttalǵanyn atap ótti.
