Almatyda qoıý qara tútin shyqqan páterden múmkindigi shekteýli er adam qutqaryldy
Vedomstvo málimetinshe, 8 jeltoqsan kúni keshki saǵat 19:29-da Almaty qalalyq Tótenshe jaǵdaılar departamentiniń kezekshi pýltine M. Áýezov aýdanyndaǵy «Aqsaı-3» yqsham aýdanynda páter órtenip jatqany týraly habarlama túsken.
Alǵashqy órt sóndirýshiler 6 mınýtta oqıǵa ornyna jetken. Kúzet bastyǵy Aıbek Baıysbekov bes qabatty úıdiń tórtinshi qabatyndaǵy páterde 3-shi toptaǵy múgedek er adam bolýy múmkin degen aqparat alǵan. Gaz jáne tútinnen qorǵaý qyzmeti barlaý barysynda páterden 1966 jyly týǵan er azamatty tapty.
«Qutqarýshylar esikti ashyp kirgen kezde eki bólmeli páterdiń ishin qoıý qara tútin basyp, eshteńe kórinbegen. Barlaý jumystaryn júrgizý barysynda qonaq bólmeniń qabyrǵasyna súıenip, es-tússiz otyrǵan 55 jastaǵy er adam tabyldy. Onyń astyndaǵy matrats byqsyp janyp jatqan. Órt sóndirýshi-qutqarýshylar Maqsat Serikov pen Jánibek Taýbaev er adamdy dalaǵa alyp shyǵyp, jedel járdem kelgenshe jyly kórpege orap qoıdy. Al kúzet bastyǵy Aıbek Baıysbekov pen órt sóndirýshi Orynbasar Áshimov órtti sóndirip, bólmeni jeldetti», - dep habarlady Tótenshe jaǵdaılar departamentiniń baspasóz qyzmeti.
Qart adam jedel járdem brıgadasyna tapsyryldy. Dárigerler ony tekserip, medıtsınalyq kómek kórsetkennen keıin úıine jiberdi. Qazirgi ýaqytta er adamnyń ómiri men densaýlyǵyna qaýip tónip turǵan joq.
