Almatyda qoımalardyń órtenýi: Departament túsinikteme berdi
ALMATY. QazAqparat – Almatyda 20 mamyr men 5 maýsym aralyǵynda 5 rezonansty órt boldy. Bul týraly onlaın brıfıng barysynda qalalyq TJD bastyǵynyń orynbasary Arman Baıgelov málim etti, dep habarlaıdy QazAqparat tilshisi.
Onyń aıtýynsha, megopolıstegi iri órtterdiń biri Túrksib aýdanynda ornalasqan qoımalardan shyqty. Úlken aýmaqqa jaıylǵan qyzyl jalyndy aýyzdyqtaý úshin úshin arnaıy órt sóndirý tehnıkalary men qala sý kanalynyń sýarý mashınalary jáne tikushaq jumyldyryldy .
«Barlyq órtter janý júktemesi men konstrýktıvti erekshelikterine baılanysty ártúrli dárejede boldy. Shuǵyl qabyldanǵan sharalardyń arqasynda zardap shekkender men qaıtys bolǵandar tirkelgen joq. Karantın kezinde 1525 qutqarýshy men 287 birlik tehnıka arnaıy qyzmet rejımine aýystyryldy. Kún saıyn jedel kezekshilikke 355 adam, 118 birlik tehnıka jáne 3 áýe borty qyzmetke kiristi»,– dedi Arman Baıgelov.
Eki nysanan shyqqan órt elektr symdarynyń qysqa tuıyqtalýynan oryn aldy. Atap aıtar bolsaq, 26 mamyrda Áýezov aýdany Mustaı Kárim kóshesi 1B/3 mekenjaıynda, 970 sharshy metr aýmaǵy bar kesilgen aǵash saqtalatyn qoıma otqa orandy. Al 27 mamyr kúni Jetisý aýdany Jetisý kóshesi 46/b mekenjaıynda ornalasqan «Gynıaz» qonaq úı kesheninen shyqqan órt 300 sharshy metr aýmaqty qamtydy, tilsiz jaýdyń jeke turǵyn úılerge taralýyna jol berilmedi.
«Úshinshi nysandaǵy órttiń sebebi, 29 mamyrda Túrksib aýdany Bekmahanov kóshesi 96 G mekenjaıynda dánekerleý jumystary kezinde órt qaýipsizdigi erejelerin saqtamaǵandyqtan oryn aldy. Qyzyl jalyn «MOL-KEM» JShS-iń qoımalaryna ótip, 1600 sharshy metr aýmaqqa jaıylǵan. Tórtinshi nysan boıynsha, 03 maýsym kúni Medeý aýdanyndaǵy Saǵadat Nurmaǵambetov kóshesi 150 mekenjaıynda jańadan salynyp jatqan mektep ǵımaratynyń tóbesindegi gıdrooqshaýlaǵyshpen jumys kezinde ǵımarat shatyrynan órt shyqty, onyń aýmaǵy 700 sharshy metrdi qurady. Órttiń irgeles ǵımarattarǵa taralýyna jol berilmedi jáne besinshisi ol jolaýshylar avtobýsynyń janýy»,– deıdi ol.
Onyń aıtýynsha, órttiń shyǵýynyń negizgi sebepteriniń biri, órt rejımin saqtamaý jáne órt qaýipsizdigi talaptaryn oryndamaý.
«Qazaqstan Respýblıkasynyń qoldanystaǵy zańnamasyna jáne engizilgen moratorııge sáıkes, joǵaryda atalǵan 5 obektiniń 4-i Almaty qalasynyń Tótenshe jaǵdaılar departamentimen tekserýge jatpaıtynyn aıtqym keledi. QR Kásipkerlik kodeksine sáıkes, erekshe tártippen joǵary qaýipti nysandarǵa mysaly, aýdany 2500 m2-den asatyn qoımalarǵa, aýdany 1500 m2-den asatyn saýda, tamaqtaný nysandary mindetti túrde jylyna bir ret tekseriledi. Osyǵan baılanysty órt qaýipsizdigi men memlekettik jáne jeke menshiktiń, sondaı-aq adamdardyń ómirin órtten saqtaý qaýipsizdigin qamtamasyz etýge jaýapty adamdardyń jaýapkershiligi artyp keledi.
Sonymen, «Órt qaýipsizdigi erejelerine qoıylatyn jalpy talaptar» tehnıkalyq reglamentine sáıkes - nysandardaǵy órt qaýipsizdigin qamtamasyz etý nysandardyń ıelerine, menshik túrine qaramastan uıymdardyń, kásiporyndardyń basshylaryna, sondaı-aq jeke kásipkerlerge júktelgen. Óz kezeginde uıymdardyń basshylary órt qaýipsizdigin qamtamasyz etý úshin belgilengen tártipte jumystyń belgili bir salalarynda órt qaýipsizdigin qamtamasyz etý úshin jaýapty tulǵalardy taǵaıyndaýy kerek.
«Eger obektide órt qaýipsizdigi normalary men erejelerin saqtamaý saldarynan órt týyndasa, jaýapkershilik QR Ákimshilik quqyq buzýshylyq týraly kodeksiniń 410-babyna sáıkes, eskertý nemese 5-ten 50 AEK-ke deıin (13890 teńgeden 138 900 teńgege deıin) aıyppul túrinde qarastyrylǵan.
Menshik ıeleri kelesi máselelerge nazar aýdarýlary kerek:
- órtten jáne tútinnen tazartý júıelerin tazalap ustaý, olar bolmaǵan jaǵdaıda ornatý boıynsha sharalar talap etiledi;
-elektrtotehnıkalyq sharýashylyqty jaqsy jaǵdaıda ustaý;
-dánekerleý jáne órt jumystary kezinde órt qaýipsizdigi erejelerin saqtaý;
-nysan personaldarymen mindetti túrde órt qaýipsizdigi erejelerin saqtaý týraly nusqaýlyqtar ótkizý.
