Almatyda qoıan-qoltyq urystan ІІІ Álem chempıonaty ótedi

Bul jaıly Dúnıejúzilik qoıan-qoltyq urys federatsııasynyń prezıdenti Amangeldi Shabdarbaev búgin Almatyda ótkizgen baspasóz máslıhatynda aıtty.

Atalmysh sport dodasynyń  júlde qory 50 myń AQSh dollaryn quraıdy. Oǵan bıyl álemniń 30 elinen 200-ge jýyq sportshy qatyspaq. Jarysty uıymdastyrýshy - Dúnıejúzilik qoıan-qoltyq urys federatsııasy.  1999 jyly Qazaqstanda qurylǵan bul uıymnyń qyzmeti qoıan-qoltyq urysty sporttyq jekpe-jektiń bir túri retinde tanytyp, damytýǵa baǵyttalǵan. Federatsııanyń negizgi maqsaty  qoıan-qoltyq urysty halyqaralyq deńgeıde derbes sport túri retinde damytýǵa jáne jalpaq jurtqa tanytýǵa baǵyttalǵan keshendi baǵdarlamany júzege asyrý bolyp sanalady.

"Qazaqstan qashanda erjúrek batyrlarymen ataǵy shyqqan el. Sondyqtan da Dúnıejúzilik qoıan-qoltyq urys federatsııasy  bizdiń memleketimizde quryldy. Qoıan-qoltyq urys - sporttyń eń patrıottyq túrleriniń biri. Dúnıejúzilik qoıan-qoltyq urys federatsııasy sporttyń bul túriniń halyqaralyq deńgeıde moıyndalyp, aldaǵy ýaqytta Olımpıada oıyndary baǵdarlamasyna engizilýi úshin barlyq kúsh-jigerin jumsaıtyn bolady», - deıdi Amangeldi Shabdarbaev.

Jalpy qoıan-qoltyq urys - jekpe-jek óneriniń eń tıimdi tásilderine negizdelgen arnaıy bilim men tehnıkalyq tásilder júıesi. Ol áskerıler men quqyq qorǵaý organdary qyzmetkerleriniń ámbebap qorǵanys tehnıkasyn jetildirý maqsatynda paıda bolyp, jetildirilgen qyzmettik-qoldanbaly sport túri. Qazirgi zamanǵy qoıan-qoltyq urys stıli jattyqtyrýshylar, ǵalymdar jáne sportshylardyń kóp jyldyq tájirıbesi men shyǵarmashylyq izdenisteriniń nátıjesinde qalyptasty. Olar tıimdi ári utymdy tásilderdi paıdalana otyryp, boks, dzıýdo, sambo, djıý-djıtsý, taı boksy jáne kık-boksıngtiń jetistikterin biriktirip  qoıan-qoltyq urys tehnıkasyn baıytty. Dúnıejúzilik qoıan-qoltyq urys federatsııasy (Arm Combat World Federation)  - jekpe-jektegi jańa baǵyttardyń biri. Onda jekpe-jek óneriniń ózge túrlerindegi sııaqty sportshylardy rýhanı-izgilik turǵysynan tárbıeleý negizge alynady. Sporttyń bul  túrin sanaǵa sińirip, kópshilikke tanytý maqsatynda «Keńpeıildi kúshter. Dúnıejúzilik qoıan-qoltyq urys federatsııasy» dep atalatyn arnaıy fılm túsirilip, kitap shyǵaryldy.