Almatyda qosymsha 24 avtobýs baǵyty ashylady
ALMATY. QazAqparat – Almaty ákimi Baqytjan Saǵyntaev halyqpen esepti kezdesýinde bıyl qala ishinen jáne qala syrtynan 24 jańa baǵyt ashylatynyn aıtty, dep habarlaıdy QazAqparat tilshisi.
Ákimniń sózinshe, qala halqynyń sany artqandyqtan ári qala aımaǵynyń keńeıýine baılanysty qoǵamdyq kólik baǵyttaryn jelisin ońtaılandyrý qajettigi týǵan.
Qalada marshrýt jelisiniń uzaqtyǵy – 5 myń shaqyrym.
Byltyr qala turǵyndarynyń ótinishimen 14 jańa baǵyt ashyldy. Olardyń 8-i qala syrtyna qatynaıdy.
Máselen Boraldaı aýylymen Almaty-1 temirjoly vokazalynyń arasynda jańa №10 marshrýt jolǵa shyqty.
«2020 jyly 24 jańa baǵyt ashylady. Bul baǵyttarda 291 avtobýs qyzmet etetin bolady. Sonymen qatar, Almaty – Qapshaǵaı baǵytynda elektr poıyzyn jiberý kózdelgen», - dedi ákim.
Bul sharalardyń arqasynda jolaýshylar aǵyny kúnine 850 myńnan 1,2 mln adamǵa artty.
Aıta keteıik, Almatyda Baqytjan Saǵyntaevtyń esepti kezdesýi ótip jatyr.
