Almatyda qosqabatty týrıstik avtobýs jolǵa shyǵady
ALMATY. QazAqparat - Almatyda shildeden bastap qos qabatty týrıstik avtobýs jolǵa shyǵady, dep habarlaıdy QazAqparat tilshisi.
Qala bıligi Almatyny London men Barselonaǵa aınaldyrmaq.
«Qyrkúıek aıynan bastap London men Barselonadaǵy sııaqty qosqabatty avtobýs tartýǵa bar kúshimizdi salyp jatyrmyz. Shildede týrıstik avtobýstar jolǵa shyǵady. Bul avtobýstar Respýblıka alańynan Seıfýllın dańǵylyna deıin, ary qaraı Ál Farabı dańǵylyna deıin, Essentai Mall saýda úıiniń mańynda bir toqtap, odan ári Tuńǵysh Prezıdent parkine deıin júretin bolady. Sosyn sol saıabaqtan Dostyq kóshesine qaıta kelip, Joldasbekov kóshesimen tómen túsip, alańǵa qaıta oralady», - dedi qalalyq Týrızm basqarmasynyń basshysy Maqsat Qıqymov.
Onyń aıtýynsha, Almatyda qos qabatty avtobýstardyń júrýine trolleıbýstyń symdary kedergi keltiredi. Bul másele de qala ákimdigi tarapynan sheshimin tappaq.
Bastapqy kezeńde bir ǵana avtobýs shyǵady. Keıin týrıstik kólikterdiń sany 2-3 bolýy yqtımal. Joba jekemenshik ınvestıtsııalarmen salyndy.
«Avtobýstarda jol júrý quny 1,5 myń teńge bolmaq. Stýdentter men zeınetkerlerge 800 teńge bolmaq. Al mektep jasyna deıingi balalarǵa, múgedekterge tegin bolmaq», - dedi M.Qıqymov.
