Almatyda kóshpendiler mádenıeti týraly halyqaralyq konferentsııa ótedi
ALMATY. 8 qarasha. QazAqparat /Erlik Erjanuly/ - Almatyda 15- qarasha kúni "Eýrazııa aýmaǵyndaǵy kóshpendiler mádenıeti» dep atalatyn halyqaralyq ǵylymı-tájirıbelik konferentsııa ótedi.
QR Táýelsizdiginiń 20 jyldyǵyna arnalǵan bul sharany QR Tuńǵysh Prezıdenti qorynyń qoldaýymen Almaty tehnologııalyq ýnıversıteti uıymdastyryp otyr. Maqsat - kóshpendiler mádenıetiniń tarıhı qundylyqtaryn jan-jaqty ashyp kórsetip, olardyń qazirgi Qazaqstan qoǵamyndaǵy estetıkalyq jáne órkenıettilik qyzmetiniń tarıhı sabaqtastyǵyn aıqyndaý. Konferentsııa jumysy mynandaı taqyryptar boıynsha ótpek - Eýrazııa aýmaǵynda ómir súrgen kóshpendilerdiń etnıkalyq máseleleri; Ejelgi kóshpendilerdiń rýhanı jáne materıaldyq qundylyqtary; Ejelgi kóshpendilerdiń jazý tańbalarynyń qalyptasý tarıhy; Eýrazııa aýmaǵynda ómir súrgen etnıkalyq toptardyń qazaqtarmen tarıhı sabaqtastyǵy; Saqtardyń (skıf) qolónerindegi «ań stıliniń» qoldaný máneri. Alqaly bul jıyn kezinde M.Ómirbekovanyń «Kóshpendiler mádenıeti. Qazaqtyń dástúrli óneriniń mádenı rámizdik negizderi» atty monografııasy men «Saq (skıf) kıim úlgileri men Qazaqstan petroglıfteri» atty kollektsııasy tanystyrylady. Sondaı-aq kıiz, gobelen buıymdarynan jasalǵan kórkemdik jumystardyń «Pazyryq» jáne stýdentterdiń «Ań stılindegi» shyǵarmashylyq kórmeleri ótedi.
