Almatyda kóshpeli saýda núkteleriniń ornalasýyna ortaq talap qoıylady
ALMATY. QazAqparat – Qalanyń erekshe mártebesi týraly zańnan soń Almatyda kóshpeli saýda oryndarynyń ornalasýyn retteıtin ereje bekitiletin boldy. Bul týraly búgingi brıfıng barysynda «Almaty damý ortalyǵy» AQ basqarma tóraǵasy Sanjar Іztileýov aıtty, dep habarlaıdy QazAqparat tilshisi.
«Bul erejeleniń bekitilýi qalanyń sáýlettik kelbetin jaqsartýǵa, turǵyndardyń qajettiligine qaraı kóshpeli saýda nysandaryn ornalastyrýǵa múmkindik beredi. Salyq túsimi kóbeıip, kólegeıli ekonomıkanyń kólemin azaıtady. Bul óz kezeginde shaǵyn jáne orta kásiporyndar úshin bıznes klımatty jaqsartýǵa múmkindik bolmaq», - dedi qala ákiminiń orynbasary Muhıt Ázirbaev.
Eń bastysy bul nysandardy ornalastyrýda balama saýda oryndarynyń joqtyǵy, ınjenerlik jelilerdiń bolǵany, jaıaý júrginshiler men kólikke kedergi keltirmeýi eskeriletin bolady.
Shaǵyn jáne orta kásiporyndarǵa qala qurylysy erejeleri men dızaın kod aıasynda arnaıy usynys beriledi. Sondyqtan, kásipkerge eskızdi bekitý úshin quzyrly organdy jaǵalap taban tozdyrýdyń qajettiligi bolmaıdy.
«Almaty bıznesti júrgizý men ómir súrýge yńǵaıly qala bolýy tıis. Jaz, kúz mezgilinde adamdar syrtta otyryp tamaqtanǵysy keledi. Jazǵy tamaqtaný oryndary sáýlet normalaryna saı jasalýy tıis», - dedi qala ákiminiń orynbasary.
Sanjar Іztileýov atalǵan usynystardyń barlyǵy Almaty qalalyq kásipkerler palatasynda talqylanatynyn aıtty.
Aıta ketý kerek, QR Prezıdenti Qasym-Jomart Toqaevtyń Joldaýynda Úkimetke úsh iri qalanyń ákimdikteriniń quzyryn keńeıtý týraly tapsyrma berilgen bolatyn.
Atap aıtqanda, olarǵa qala qurylysy saıasaty, kólik ınfraqurylymy, sáýlettik kelbetin ózgertýge quzyryn keńeıtý týraly aıtylǵan. Joldaýdan soń QR Ulttyq ekonomıka mınıstrligi men memlekettik organdar birlese otyryp QR Úkimetine usynystar berdi. Osylaısha 28 jeltoqsanda Memleket basshysy tıisti Jarlyqqa qol qoıyp, «Almaty qalasynyń erekshe mártebesi týraly zań» qabyldandy.
