Almatyda qoshqar kóterýden jańa rekord ornady
Almatynyń ortalyq meshitinde Asyl mura baǵdarlamasy aıasynda musylmandardyń merekesi Qurban aıtqa arnalyp ulttyq sport túrlerinen jarystar ótti.
Bul sharany tańǵy aıt namazyna kelgen 4,5 myń adam tamashalady. Kez kelgen qatysýshy ózderin qoshqar kóterý, qol kúres, baǵanaǵa shyǵý jáne asyq atýdan synap kórdi.
Jeńimpazdar men júldegerler baǵaly syılyqtar, sondaı-aq, qoshqar kóterý júldegerleri 40 keli qoshqarlarǵa ıe boldy. Onyń ekeýi 505 jáne 510 ret kótergen jas palýandar Baýyrjan Ábdihaıym men Ilıas Jumaıǵa buıyrdy.
«Men qatysaıyn ba joq pa dep kóp oılandym. Sebebi alda Reseıde jarys kútip tur. Biraq 505 degendi kórip, jigerlenip, qatysýǵa bel býdym. Osylaısha 510 ret kóterip ózim úshin rekord ornattym. Men árqashanda óz qarsylasymdy jeńýge tyrysatyn adammyn. Eger ol qoshqardy 600 ret kótergende, men 605-ke jetkizýge talpynatyn edim», - deıdi erkin kúresten Qazaqstan ulttyq quramasynyń múshesi Ilıas Jumaı.
Ilıas Jumaı osynyń aldynda, eki aı buryn osy baǵdarlamanyń ashylýynda da dál osyndaı qoshqardy 205 ret kóterip utyp alǵan bolatyn. Ol kúrespen 8 jasynan bastap aınalysyp, elimizdiń abyroıyn kóptegen halyqaralyq jarystarda qorǵap júr.
Aıta ketý kerek, búgingi sharanyń qonaqtaryna jarystardan bólek arnaıy dastarhan jaıylyp, balalarǵa táttiler taratyldy. «Asyl mura» baǵdarlamasy qaladaǵy meshitke kelýshi jamaǵattar arasynda buqaralyq sportty damytýǵa baǵyttalǵan.
