Almatyda kóshi-qon úderisterin tıimdi basqarý týraly aımaqtyq semınar-trenıng ótedi
ALMATY. 6 qarasha. QazAqparat - Almatyda erteń, 7 qarasha kúni «Kóshi-qon úderisterin tıimdi basqarý áleýmettik turaqtylyqty saqtaý faktory retinde» degen taqyrypta 3 kúndik biliktilikti arttyrýdyń aımaqtyq semınar-trenıngi óz jumysyn bastaıdy.
Ony Qazaqstan halqy Assambleıasy men QR Prezıdentiniń janyndaǵy Memlekettik basqarý akademııasynyń Etnosaralyq jáne konfessııaaralyq qatynastardy zertteý ortalyǵy birlesip uıymdastyryp otyr. Bul sharaǵa Almaty qalasynyń kóshi-qon saıasaty men etnosaralyq jáne konfessııaaralyq qatynastar máselesimen aınalysýshy memlekettik qyzmetshileri, qala jáne aýdan ákimderiniń orynbasarlary, qalalyq jáne aýdandyq ishki saıasat basqarmalarynyń basshylary, etnomádenı, jastar jáne basqa da qoǵamdyq birlestik jetekshileri, konfessııalar ókilderi, Almaty qalalyq Qazaqstan halqy Assambleıasy ǵylymı-sarapshylyq tobynyń, joǵary oqý oryndary men buqaralyq aqparat quraldarynyń ókilderi qatyspaq.
Sonymen qatar semınar-trenıng aıasynda 9 qarasha kúni «Yqpaldastyq úderister kontekstindegi etnosaıasat jáne dıasporalyq saıasat» dep atalatyn dóńgelek ústel jıyny ótedi. Onda kóshi-qon saıasatyn tıimdi basqarý, etnosaıasatty nyǵaıtý máselesi jan-jaqty sóz bolmaq. Oǵan QR Parlamenti Májilisiniń depýtattary, Qazaqstan halqy Assambleıasy men QR Prezıdentiniń janyndaǵy Memlekettik basqarý akademııasynyń ókilderi, jetekshi ǵalymdar, sarapshylar, etnomádenı, jastar jáne basqa da qoǵamdyq birlestik jetekshileri, kóshi-qon, etnosaralyq jáne dinaralyq qatynastar máselesimen aınalysatyn memlekettik qyzmetshiler qatysady dep josparlanyp otyr.
