Almatyda kóshi-qon máseleleri keńinen qozǵalmaq
ASTANA. QazAqparat - Erteń Almatydaǵy Dúnıejúzi qazaqtary qaýymdastyǵy «Kóshi-qonnyń búgingi jaǵdaıy» atty dóńgelek ústel jıynyn ótkizedi. Oǵan QR Eńbek jáne halyqty áleýmettik qorǵaý mınıstrliginiń Kóshi-qon komıtetinen jáne QR Іshki ister mınıstrliginiń Kóshi-qon polıtsııasy departamentinen arnaıy ókilder shaqyrylyp otyr.
Bul sharaǵa sondaı-aq kóshi-qon máselelerine beıjaı qaramaıtyn qoǵam qaıratkerleri, aqyn-jazýshylar jáne túrli qoǵamdyq uıymdar men buqaralyq aqparat quraldarynyń ókilderi qatyspaq. Buǵan 22 sáýirde Astanadaǵy Ortalyq kommýnıkatsııalar qyzmetinde ótken brıfıngtegi QR Eńbek jáne áleýmettik qorǵaý mınıstri Tamara Dúısenovanyń málimdemesi túrtki bolyp otyr.
Eske salaı keteıik, 2013 jyly 10 jeltoqsanda bekitilgen «Qazaqstan Respýblıkasynyń keıbir zań aktilerine eńbek mıgratsııasy máseleleri boıynsha túzetýler men tolyqtyrýlar engizý týraly» Zańǵa sáıkes oralmandarǵa azamattyq Qazaqstanǵa kóship kelgen soń 4 jyldan keıin beriletin bolǵan edi. Al 8 sáýirden bastap Úkimettiń «Oralmandardy jaıǵastyrý óńirlerin aıqyndaý týraly» №248 Qaýlysy boıynsha Aqmola, Atyraý, Batys Qazaqstan, Qostanaı, Pavlodar, Soltústik Qazaqstan jáne Shyǵys Qazaqstan oblystarynan ózge óńirlerge kelgen etnıkalyq qazaqtarǵa oralman mártebesin berý toqtatylǵan bolatyn. T. Dúısenova óz málimdemesinde bul aımaqtardan ózge jerlerge kelgen etnıkalyq qazaqtarǵa «shetel azamaty retinde tólem qabiletin rastaýy» týraly shekteý alynyp tastalǵanyn, endi syrttan kelgen qandastarymyzǵa kelesi jyldan bastap Qazaqstannyń qaı óńirine kelse de oralman mártebesi beriletinin jáne 1 jyldyń ishinde azamattyq ala alatynyn jetkizgen edi.
Jalpy kóshi-qon máselesi boıynsha 22 sáýirde ótken Úkimet otyrysynan keıin QR Eńbek jáne áleýmettik qorǵaý mınıstrligi janynan quramyna barlyq quzyrly organ ókilderi men Dúnıejúzi qazaqtary qaýymdastyǵy tarapynan tóraǵanyń orynbasary Sultanáli Balǵabaev kiretin arnaıy jumys toby qurylǵan bolatyn. Oralmandar men olardyń otbasy múshelerin beıimdeý jáne yqpaldastyrý tetigin jetildirý jónindegi vedomstvoaralyq jumys toby Qazaqstan zańnamalary men normatıvtik-quqyqtyq aktilerine engiziletin ózgerister men tolyqtyrýlar týraly óz usynysyn mınıstrlikke 5 mamyrǵa deıin tabys etýi tıis bolǵan. Endi bul másele Dúnıejúzi qazaqtary qaýymdastyǵynyń osy jıynynan keıin 15 mamyrda Mınıstrlikter úıinde ótetin jumys tobynyń otyrysynda talqylanbaq.
Aıta keteıik, Eńbek jáne halyqty álýemettik qorǵaý mınıstrliginiń málimetterine qaraǵanda, 1991 jyldan beri Qazaqstan 994 myń oralmandy qabyldap úlgergen. Qazirgi ýaqytta olar jalpy halyq sanynyń 5,5 paıyzyn quraıdy.
