Almatyda kósheniń ortasynda kólik órtendi
ALMATY. QazAqparat – Almatyda kóshede jeńil kólik otqa orandy, dep habarlaıdy QazAqparat tilshisi.
Almaty qalalyq Tótenshe jaǵdaılar departamentiniń «101» pýltine búgin tańǵy saǵat 9:57 mınýtta Raıymbek dańǵyly men Bókeıhanov kóshesiniń qıylysynda jeńil mashınanyń órtenip jatqany týraly habarlama tústi.
«Órt sóndirýshiler kelgen kezde 1990 jyly shyqqan «Mercedes-Benz 190 E» avtokóligi janyp jatty. Qyzyl jalyn 8 mınýtta sóndirildi», - dep habarlady vedomstvadan.
Tótenshe jaǵdaılar qyzmeti júrgizýshilerge kólik lezde órtenip ketetinin eske saldy.
«Materıaldyq shyǵynǵa jol bermeý úshin tehnıkalyq qyzmet kórsetý ortalyǵyna ýaqytyly qaratyp turý qajet. Qys mezgilinde ashyq otty qoldanbaǵan jón», - dep tolyqtyrdy vedomstvodan.
