Almatyda kóshelerge G.Belger, T.Bıgeldınov syndy tulǵalardyń esimderi beriledi
ALMATY. QazAqparat - Almatyda kóshelerge Sh.Aıtmatov, G.Belger, T.Bıgeldınov, E.Serkebaev, Q.Kenjetaev, S.Kalmykov, Q.Myrzalıev syndy tulǵalardyń esimderi beriledi, dep habarlaıdy QazAqparat tilshisi.
Almaty ákimdiginiń habarlaýynsha, megapolıste 42 kóshege elimizdiń damýyna úles qosqan qaıratkerler esimi beriledi, qalǵandary geografııalyq ataýǵa, qazaqstannyń tarıhy men mádenıetine, dástúrine oraı atalatyn bolady.
«Sh.Aıtmatov, G.Belger, T.Bıgeldınov, E.Serkebaev, Q.Kenjetaev, S.Kalmykov, Q.Myrzalıev, Almaty aportynyń «ákesi» atanǵan E.Redko jáne basqalardyń esimderin alǵan kósheler paıda bolady», delingen ákimdik habarlamasynda.
Eske salsaq, Almatyda buryndary birin-biri qaıtalaıtyn 100 kóshe ataýy ózgergen bolatyn. Qalaǵa qosylǵan eldi mekenderdi eseptegende megapolıste Abaı atynda - 12. M. Áýezov atynda -3, J. Jabaev atynda -13, Qurmanǵazy atynda - 6, Tóle bı atynda - 5, Qazybek bı atynda - 3, Áıteke bı atynda - 3, Raıymbek batyr atynda - 8, Naýryzbaı batyr atynda - 4, Qarasaı batyr atynda - 8, Baıtursynov atynda - 4, S. Seıfýllın atynda - 5, Á. Moldaǵulova atynda - 6, M. Mámetova atynda 6 kóshe atalǵan eken.
Qalalyq ákimdiktiń habarlaýynsha memlekettik organdar bazada kóshe ataýy ózgergen soń qajetti anyqtamalardy elektrondy úkimet portalynyn nemese HQKO-dan birneshe mınýt ishinde ala alady.
