Almatyda kósheler qardan tazartylyp jatyr
ALMATY. QazAqparat – Almaty kóshelerinen 6446 tekshe metr qar shyǵaryldy. Qar kúreý jumystary jalǵasýda, dep habarlaıdy QazAqparat tilshisi.
«Almaty qalasynyń kommýnaldyq qyzmetteri qala joldarynda kóktaıǵaqtyń qalyptasýyna jol bermeý úshin 4242 tonna arnaıy materıal seýip shyqty. Qar kúreý jumystaryna 641 tehnıka jumyldyryldy», – dep habarlady qalalyq ákimdikten.
Sondaı-aq ákimdik taratqan málimetterge qaraǵanda, qala kóshelerin qardan tazartý jumystaryna 512 adam tartylǵan. Qazirgi ýaqytta trotýarlar men qoǵamdyq kólik aıaldamalary jáne kólik turaǵyna bólingen arnaıy oryndardy tazalaý jumystary júrgizilip jatyr.
Qalalyq jáne aýdandyq ákimdikterde qar shyǵarý jumystaryn baqylaý úshin táýlik boıy qyzmet etetin arnaıy kezekshilik uıymdastyryldy.
