Almatyda kósheden 3 jastaǵy qyz bala tabyldy
ALMATY. QazAqparat - Almatyda úsh jasar qyz kóshede adasyp ketken jerinen tabyldy, dep habarlaıdy QazAqparat tilshisi.
Almaty polıtsııa departamenti baspasóz qyzmetiniń málimetinshe, 8 maýsym kúni Túrksib aýdandyq polıtsııa basqarmasyna jergilikti turǵyndardan qońyraý kelip túsken.
Seıfýllın dańǵylyna jetpeı Palladın kóshesinde 3 jasar qyz tabylǵan. Qońyraý shalýshylardyń aıtýynsha, bala eresekterdiń qaraýynsyz júrgen.
«Balanyń jáne onyń anasynyń jeke basy birden anyqtaldy. Ol sol ýaqytta jumysta bolǵan. Áıel qyzyn 10 jastaǵy úlken ulymen úıde qaldyrǵanyn aıtty. Uly uıyqtap jatqanda, búldirshin úıden shyǵyp ketip, joǵalyp ketken. 1994 jyly týǵan azamatshamen aldaǵy ýaqytta mundaı faktilerge jol bermeý týraly profılaktıkalyq áńgime ótkizildi. Otbasy turǵylyqty jeri boıynsha tekserildi», – dedi Túrksib aýdandyq PB janyndaǵy polıtsııa bóliminiń bastyǵy Erkin Amantaev.
