Almatyda kóshe-jol jelileri zerttelip jatyr

ALMATY. QazAqparat - Qalalyq mobıldilik basqarmasy «QazJOLǴZI» AQ-men birlesip Almaty qalasynyń kóshe-jol jelilerine zertteý júrgizip jatyr, dep habarlaıdy QazAqparat tilshisi.

Mundaı zertteýler kólik qozǵalysyn paıdalaný kórsetkishterin (tegis, oıyq, aqaýlar, kedir-budyrlar jáne t.b.), beıne materıaldardy, sondaı-aq joldyń geometrııalyq parametrlerin jınaýǵa múmkindik beredi.

«Jyljymaly jol zerthanasy - derekterdi sınhrondaý, problemaly ýchaskelerdi belgileý jáne taldaý, oıyq joldardy avtomatty túrde jikteý, jol qurylymy qabattarynyń serpimdi modýlderin anyqtaý júıelerimen jabdyqtalǵan. Lazerlik skanerler joldyń aqaýlaryn dál anyqtaýǵa jáne jumys ýaqytyn únemdeýge múmkindik beredi»,-dep habarlady basqarmadan.

Dıagnostıka joǵary sapaly úsh ólshemdi keskinder shyǵarýǵa, sondaı-aq qamtý profılin qurýǵa, basqa taldaý júıelerin ıntegratsııalaý jónindegi nátıjelerdi tsıfrlyq formatta alýǵa múmkindik beredi.

«Nátıjesinde mamandar kólik joldary men kóshelerdi ınstrýmentaldy zertteýdiń qorytyndylaryn alady, sonyń negizinde jóndeý jumystarynyń tıimdi túrleri anyqtalady. Budan ózge, zertteý jumystary qalanyń kóshe-jol jelisin basqarýdyń tsıfrlyq jelisin qurýǵa (málimetter bazasy) múmkindik beredi ári sol arqyly qozǵalys jaǵdaıyn jáne qarjylyq shyǵyndardy boljaýǵa bolady»,-dep atap ótti Almaty qalalyq mobıldilik basqarmasy.