Almatyda kóshe shamdary kúndiz nelikten óshpeı qalady
ALMATY. QazAqparat - Almatyda 2019 jyly kóshendi jaryqtandyrý júıesi tolyǵymen jańaryp, jańa jeliler salynady. Atap aıtqanda, Almatyda shamamen 200 kóshede eski shamdardyń ornyna jaryq dıodty shamdar ornatylady, dep habarlaıdy QazAqparat tilshisi.
Almaty Energetıka jáne kommýnaldyq sharýashylyq basqarmasynyń baspasóz qyzmetinen habarlaǵandaı, Alataý aýdanynda - 33 kóshede, Áýezov aýdanynda - 64, Jetisý aýdanynda - 32, Medeý aýdanynda - 32, Túrksib aýdanynda - 39, Bostandyq aýdanynda - 12 jáne Naýryzbaı aýdanynda 8 kóshede shamdar aýystyrylady.
«Jańa jaryq dıodty LED shamdardyń árqaısysy 99 myń teńge turady. Bul somaǵa shamnyń quny, montaj jumystary, eski shamdy buzý, bıiktiktegi jumystardyń aqysy kiredi», - dedi basqarma basshysy orynbasarynyń mindetin atqarýshy Dáýren Jandybaev.
D.Jandybaev sondaı-aq, kúndiz de janyp turatyn kóshe shamdaryna qatysty almatylyqtardyń suraǵyna jaýap berdi.
«Qazir jaryq tirek baǵandarynyń sany anyqtalyp jatyr. Ár ýchaskede tokpen qamtý qobdıshasy ornatylǵan. Lınııaǵa toq sodan keledi. Sonyń kesirinen kúndiz 15-20 mınýtqa keıde kóshe jaryǵy qosylyp qalady. Sonymen qatar, qas qaraıa jelide kerneý togy bolǵandyqtan, apattyq jumystar (qysqa tuıyqtalý, úzilý) jasalmaıdy. Jóndeý jumystary tek kúndiz júrgiziledi. Sondyqtan kúndiz apattyń joıylǵanyn tekserý úshin az ýaqytqa jaryq qosylady», - dedi D.Jandybaev.
Osy maqsatta dıspetcherlik qyzmet jumysyn nyǵaıtý ári jelidegi apattyq jaǵdaılardy boldyrmaý úshin SIMATICSTEP 7 (TIAPortal) V14 bazasyndaǵy baǵdarlamalyq qamtý jasaldy.
«Jańa shamdardyń eskiden aıyrmashylyǵy ekologııalyq turǵydan tazalyǵynda. Quramynda zııandy jáne qaýipti zattar joq. Ony joıý úshin kóp kúsh jumsalmaıdy. Mehanıkalyq turǵydan shamdar syrtqy faktorlardan qorǵalǵan. Jaryq shamdary qyzýy úshin aldyn ala qyzdyrý qajettigi joq. Sonymen qatar, energııa tutyný kórsetkishi anaǵurlym tómen»,- dedi Dáýren Jandybaev.
Aıta ketý kerek, Memleket basshysynyń Joldaýyn júzege asyrý jáne Almatyda jaıly ortany qalyptastyrý maqsatynda Almatyda shamdardyń 31,5% energııa únemdeıtin jáne jaryq dıodty lampalarǵa aýystyrylǵan.
2019-2026 jyldarǵa arnalǵan «Almaty qalasynyń syrtqy jaryqtandyrý jelisin qaıta jańǵyrtý» memlekettik-jekeshelik áriptestik aıasynda 1375 km syrtqy jaryqtandyrý jelisi men 42 052 tirek baǵanyn qaýystyrý josparda bar. Sondaı-aq, trotýarlardy jaryqtandyrýǵa 1 253 qosymsha sham ornatylady.
Bul baǵdarlama bitken soń Almatyda energoúnemdeýshi LED jaryqtandyrý jelisi tolyǵymen 100 paıyzǵa jańarady.
20189 jyly 8000 shamdy jaryq dıodty shamǵa aýystyrý josparlanǵan.
