Almatyda kóshe fotograftarynyń kórmesi ótedi
ALMATY. QazAqparat – Almatyda kóshe fotograftarynyń «Almaty. Shyǵarylǵan taspa» atty kórmesi ótedi, dep habarlaıdy QazAqparat tilshisi.
Almaty qalasynyń ákimdigi jáne «Eýrazııalyq Mádenı Alıans» QB birlesip almatylyq kóshe fotograftary Alım Haıdarov pen Baýyrjan Sábıtovtiń kórme-dıalogyn usynady.
Kórmeniń kýratory, fılosof Olga Veselovanyń aıtýynsha, kadrlarda fotograftar qala ómirin ár qyrynan kórsetedi. Sheberlerdiń shyǵarmalarynda jalpy sıýjet qana emes, sonymen birge týǵan qalasyna degen úlken súıispenshilik kórsetiledi.
«Alım Haıdarov búkil ómirin seldiń aldyn alýǵa jáne zertteýge arnady. Bul jumys Almaty úshin Іle Alataýy taýlaryna jaqyn ornalasqandyqtan óte mańyzdy. Kásibı qyzmetimen qatar, Alım Haıdarovty óziniń týǵan jeri Almatynyń tirshiligi de asa qyzyqtyrdy. Bul geologtyń fotomuraǵatynda qamtylǵan. Vernyıdyń aǵash aýlalarynyń tarıhy, bizge burynnan tanys Almatynyń romantıkalyq qurylysy, qazir megapolıstiń kóshesine aınalǵan qańyrap jatqan dala. Bul sıýjetter Alım Haıdarovtyń fotografııalyq áserlerimen baıandalady»,– dedi Olga Veselova.
Sonymen qatar, kórmede qalanyń sońǵy birneshe onjyldyq tarıhyn zamanaýı sýretshi Baýyrjan Sábıtov tanystyrady.
Joba dástúrli túrde qala kúnine oraılastyrylatyn birqatar merekelik is-sharalardy ashatyn ARTBAT FEST X zamanaýı óner festıvali aıasynda júzege asyrylady.
Kórme memlekettik «Almaty Gallery» kórkem sýret galereıasynda 19 qyrkúıek pen 4 qazan aralyǵynda ótedi.
Sonymen qatar, uıymdastyrýshylar qaýipsizdik sharalaryn saqtaý úshin galereıa keńistiginde bir mezgilde 15 adam ǵana kiretinin aıtty.
