Almatyda qosalqy elektr stansasynyń qurylysy bastaldy
ALMATY. QazAqparat - Almaty qalasy Bostandyq aýdanynyń ákimi Altaı Rahymbetov onlaın brıfıng barysynda aýdannyń áleýmettik-ekonomıkalyq damýy týraly aıtty, dep habarlaıdy QazAqparat tilshisi.
Almaty qalasyn «Shetsiz qala» qaǵıdaty boıynsha damytý qolǵa alynǵany belgili. Byltyr jyl aıaǵynda Almaty qalasy máslıhatynyń sessııasynda «Almaty-2050» damý strategııasy bekitildi. Atalǵan strategııalyq qujat, eń aldymen, almatylyqtardyń ózekti máselelerin tıimdi sheshý men halyqtyń ál-aýqatyn arttyrýdy kózdep otyr.
Aýdan ákimi osyǵan oraı jańadan qosylǵan «Alataý», «Ermensaı», «Nurlytaý», «Jaılaý»», Kókshoqy», «Almarasan», «Qarǵaly» sııaqty shaǵyn aýdandardy damytý mindeti turǵanyn aıtty.
«Bul shaǵyn aýdandardaǵy kommýnaldyq-sharýashylyq máseleleri, syrtqy jaryqtandyrýmen qamtý, sapaly aýyz sý máselesin sheshý jáne jol ınfraqurylymy men kóriktendirýge qatysty suraqtar aldyńǵy qatarǵa shyǵady. Ótken jyly osy baǵytta birqatar jumys atqaryldy. Máselen, ınjenerlik jeli qurylysy boıynsha 3,4 shaqyrym sý qubyry qaıta jóndeldi, 515 metr jylý qubyry jóndeldi jáne 2,9 shaqyrym elektr jelisi salyndy», - dedi aýdan ákimi.
Onyń aıtýynsha, byltyr «Almagúl» shaǵyn aýdany janynan uzyndyǵy 4,8 shaqyrym elektr jelisi men qosalqy stansa salý jumysy bastalǵan. Jobanyń quny 8,6 mlrd teńge.
«Aýdan turǵyndaryn sapaly aýyzsýmen qamtamasyz etý maqsatynda Nurlytaý shaǵyn aýdanynda sý tazalaý qurylǵysyn salýǵa joba smetalyq qujattama ázirlenýde. Qazirgi tańda joba memlekettik saraptamadan ótý ústinde. Atalǵan jobanyń quny shamamen 6 mlrd teńge, joba iske asqan jaǵdaıda sý tazalaý qurylǵysy táýligine 9 000 tekshe metr sý óndiredi dep kútilýde. Joba smetalyq qujattama bıyl daıyn bolady. Sonymen qatar, Nurlytaý shaǵyn aýdanynda jalpy uzyndyǵy 42 shaqyrym bolatyn sý jáne káriz qubyrlarynyń qurylysyna joba smetalyq qujattama daıyndalýda», - dedi Altaı Rahymbetov.
Sonymen qatar, ol Bostandyq aýdanynda birqatar aýla abattandyrylyp jatqanyn aıtty.
«Bostandyq aýdanyda 1 886 kóppáterli turǵyn úı menne 655 aýla bar. 2020 jyly 120 aýla aýmaǵy abattandyryldy, sondaı-aq ınvestorlar esebinen 20 balalar alańy jańartyldy. Bıyl 100 aýla aýmaǵyn kúrdeli jóndeý jáne 70 aýlaǵa JSQ ázirleý josparda. Aǵymdaǵy jóndeý jumystarymen 130 aýla aýmaǵy qamtylady», - dedi Altaı Rahymbetov.
