Almatyda «Korovabar» dámhanasyndaǵy órtti sóndirý úshin 60 metr jerdegi gıdranttan sý tartyldy - Almaty TJD
ALMATY. QazAqparat- Almaty qalasynyń Tótenshe jaǵdaılar jónindegi departamenti kóp qabatty turǵyn úıdiń birinshi qabatynda ornalasqan «Korovabar» dámhanasynda oryn alǵan órttiń qalaı sóndirilgeni týraly túsinikteme berdi.
Búgin - 10 mamyrǵa qaraǵan túni, tańǵy saǵat 04:37-de «101» pýltine bir kýágerden Almaly aýdany, Abylaı han kóshesi 121 A mekenjaıynda ornalasqan «Korovabar» dámhanasynyń órtenip jatqandyǵy týraly habar kelip túsken. Artynsha, órt sóndirýshilerdiń alǵashqy toby 7 mınýttan keıin, ıaǵnı 04 saǵat 44 mınýtta oqıǵa ornyna kelip jetti.
«Órt sóndirgish kóliktegi eki standartty sý oqpany arqyly sekýndyna 14 lıtr sý shyǵyndalady. Eger sý toqtaýsyz beriletin bolsa, onda avtotsısternadaǵy sý 8 mınýt ishinde taýsylady. Sondyqtan, aldymen sý oqpandaryn sýmen úzdiksiz qamtamasyz etip turý úshin 60 metr jerde ornalasqan sý kózinen sý tartý uıǵaryldy. Osylaısha, gıdranttan, ıaǵnı órtke sý sebý úshin qoldanylatyn sý shúmeginen tútik qubyr tartyldy. Sondyqtan, órtti baqylaǵan azamattarǵa alǵashqy kelip jetken órt sóndirýshiler órt sóndirýge tym uzaq daıyndalǵandaı bolyp kórinýi múmkin», - delingen TJD habarlamasynda.
Odan basqa, órt sóndirýmen qatar, bir mezette turǵyn úıdiń aýla jaǵynan turǵyndardy dálizder arqyly jáne joǵarǵy qabattyń terezeleri arqyly jyljymaly satylar boıynsha syrtqa shyǵarý jumystary júrgizildi.
Aıta ketelik, órt sóndirý barysynda barlyǵy 7 adam qutqarylyp, 120 adam evakýatsııalandy. Olardyń ishinde úsh bala bar. Bir adam ýytty gazǵa ýlaný nyshanymen aýrýhanaǵa jatqyzyldy. Basqalaı zardap shekkender men qurban bolǵandar joq. Tilsiz jaýdy joıýǵa Órt sóndirý qyzmetiniń jeke quramynan 115 adam men 21 arnaıy tehnıka, sondaı-aq, jergilikti polıtsııa qyzmetkerleri, jedel medıtsınalyq járdem dárigerleri, kommýnaldyq qyzmetterdiń qyzmetkerleri jumyldyryldy. Órt tańǵy saǵat 05:52-de aýyzdyqtalyp, 06 saǵat 36 mınýtta tolyǵyn sóndirildi. Órttiń jalpy aýmaǵy - 1100 sharshy metrdi qurady. Búgin kúndiz oqıǵa ornynda qala ákimi Baýyrjan Baıbek bolyp, dámhananyń menshik ıelerine turǵyn úılerdiń zaqymdalǵan páterlerin úsh kún ishinde qalpyna keltirýde tapsyrdy.
