Almatyda «Korovabar» dámhanasy órtendi - 7 adam qutqarylyp,120 adam evakýatsııalandy
ALMATY. QazAqparat - Búgin Almatyda túnde «Korovabar» dámhanasyn órt shaldy. Bul týraly jańa ǵana Almaty qalalyq TJD resmı ókili Sandýǵash Baımuhanbetova habarlady.
Onyń aıtýynsha, órttiń jalpy aýmaǵy 1100 sharshy metrdi quraǵan.
«10 mamyrǵa qaraǵan túni, tańǵy saǵat 04:37-de «101» pýltine kýágerden Almaly aýdany, Abylaı han kóshesi 121 A mekenjaıynda ornalasqan «Korovabar» dámhanasynyń órtenip jatqandyǵy týraly habar kelip tústi. Artynsha, órt sóndirýshilerdiń alǵashqy toby 7 mınýttan keıin, ıaǵnı 04 saǵat 44 mınýtta oqıǵa ornyna jetti», - dedi S. Baımuhanbetova.
Málim bolǵanyndaı, turǵyn úıge japsarlas salynǵan «Korovabar» kafesin órt shalǵan. Órttiń aýmaǵy shamamen 800 sharshy metrdi quraǵan. Soǵan baılanysty, qosymsha órt sóndirýshi bólimsheler shaqyryldy. Artynsha, turǵyn úılerdiń turǵyndary qaýipsiz aımaqqa shyǵaryla bastady.
«05 saǵat 23 mınýtta órt oshaǵynda jarylys oryn aldy. Sonyń saldarynan órt turǵyn úılerdiń balkondaryna oıysty. Osylaısha, altynshy qabatta ornalasqan balkondarǵa deıin órt shaldy», - dedi S. Baımuhanbetova.
Turǵyn úıdiń syrtqy jaǵyn sóndirý úshin oqpany bar ıindi kótergish qurylǵylar qoldanyldy. Al turǵyndar úıden gaz-tútinnen qorǵaýshylardyń kómegimen baspaldaqtar arqyly jáne tereze arqyly jyljymaly satylar boıynsha syrtqa shyǵaryldy.
«Barlyǵy 7 adam qutqarylyp, 120 adam evakýatsııalandy. Olardyń ishinde úsh bala bar. Bir adam ýytty gazǵa ýlaný nyshanymen aýrýhanaǵa jatqyzyldy. Basqalaı zardap shekkender men qurban bolǵandar joq. Tilsiz jaýdy joıýǵa Órt sóndirý qyzmetiniń jeke quramynan 115 adam men 21 arnaıy tehnıka, sondaı-aq, jergilikti polıtsııa qyzmetkerleri, jedel medıtsınalyq járdem dárigerleri, kommýnaldyq qyzmetterdiń qyzmetkerleri jumyldyryldy. Órt tańǵy saǵat 05:52-de aýyzdyqtalyp, 06 saǵat 36 mınýtta tolyǵyn sóndirildi. Órttiń jalpy aýmaǵy - 1100 sharshy metrdi qurady», - dedi S. Baımuhanbetova.
