Almatyda koronovırýs juqtyrǵan 825 adam úıinde em qabyldap jatyr
ALMATY. QazAqparat – Qazirgi ýaqytta 825 adam úıinde emdelip jatyr. Olar medıtsınalyq baqylaýǵa alynǵan. Barlyǵy jeńil dárejeli naýqastar. Bul týraly Qoǵamdyq densaýlyq saqtaý basqarmasynyń basshysy Kamaljan Nadyrov málim etti, dep habarlaıdy QazAqparat tilshisi.
«Ótken aıda osy sanattaǵy naýqastardyń sany shamamen 3 esege azaıdy jáne tómendeý jalǵasyp keledi. Іndet órshigen tusta 2 450-den astam naýqas úıden em alǵan bolatyn. Alǵashqy medıtsınalyq-sanıtarlyq kómek deńgeıinde COVID-19 vırýsy jáne pnevmonııamen emhana kómegine júgingender 36%-ǵa azaıdy. Shilde aıynyń ortasynda qalalyq emhanalarǵa 1 300-den astam naýqas júgingen, búginde emhanalarǵa táýligine COVID-19 vırýsynan seziktengen 450-ke jýyq patsıent keledi», - deıdi Kamaljan Nadyrov.
Sonymen qatar, ol aýrý kórsetkishiniń tómendeýine qaramastan, COVID-19 vırýsymen kúres boıynsha medıtsınalyq- sanıtarlyq alǵashqy kómek deńgeıindegi jumystar jalǵasyn tabatynyn aıtty. Medıtsınalyq-sanıtarııalyq alǵashqy kómek kórsetý deńgeıinde barlyǵy 74 medıtsınalyq uıym qurylǵan. Onyń 39 memlekettik emhana jáne 35 jeke menshik uıym. MSAK uıymdarynda 9 914 medıtsınalyq qyzmetker jumys isteıdi.Onyń 2 712 dáriger. MSAK uıymdaryna 2 035 366 adam tirkelgen»,– dedi ol.
Emhanalardyń jumysy mobıldi brıgadalarmen kúsheıtildi. Olardyń sany 5 esege artyp, 409 brıgadaǵa jetti. Onda 925 medıtsına qyzmetkeri jumys isteıdi.
«Ózderińiz biletindeı, shilde aıynan bastap naýqastardy monıtorıngileý ortalyǵy jumys isteı bastady. Bul rette birinshi aıdyń qorytyndysy boıynsha qaýip tobyndaǵy ambýlatorııalyq 1 500-nan astam naýqasqa keńes berildi. Búgingi jumys boıynsha COVID-19 vırýsyna oń jáne teris nátıje kórsetken naýqastarǵa nazar aýdaramyz, josparly aýrýhanaǵa jatqyzý toqtaǵan joq, barlyq medıtsınalyq uıymdar jumys istep jatyr», - deıdi Qoǵamdyq densaýlyq saqtaý basqarmasynyń basshysy Kamaljan Nadyrov.
