Almatyda koronovırýs juqtyrǵan 27 dárigerdiń jaǵdaıy qalaı
ALMATY. QazAqparat – Almatyda koronavırýs juqtyrǵan dárigerlerdiń sany 27-ge jetti. Bul týraly onlaın brıfıng barysynda qalalyq Qoǵamdyq densaýlyq saqtaý basqarmasynyń basshysy Tileýhan Ábildaev aıtty, dep habarlaıdy QazAqparat tilshisi.
Onyń aıtýynsha, 13 sáýirde Almatyda koronavırýstyq ınfektsııany juqtyrýdyń rastalǵan 172 jaǵdaıy tirkeldi.
Sonyń 27-si medıtsına qyzmetkeri bolyp shyqty.
«Onyń ishinde 21 áıel jáne 6 er adam, aralarynda bir júkti áıel bar. Medıtsına qyzmetkerleriniń ekeýiniń jaı-kúıi polısegmentti pnevmonııalaryna baılanysty – aýyr, qalǵan adamdardyń barlyǵynda – qanaǵattanarlyq dep baǵalanyp otyr. Koronavırýs anyqtalǵan 20 qyzmetker shuǵyl medıtsınalyq kómek kórsetýdi jalǵastyrǵan Qalalyq ortalyq klınıkalyq aýrýhananyń qyzmetkerleri ekeni anyqtaldy. Taǵy 7 adam - 4 sáýirdegi alǵash ret tapsyrǵan testileri teris nátıje kórsetken (ıaǵnı, dert anyqtalǵan) Balalar juqpaly aýrýlar aýrýhanasynyń qyzmetkerleri. Ádette, bular ártúrli patologııasy bar patsıentter, olardyń arasynda aýrý belgilerinsiz aǵymy bar patsıentter bolýy múmkin, sáıkesinshe bul olardyń vırýsty juqtyrýyna sebep bolýy da múmkin», - dedi Tileýhan Ábildaev.
Basqarma basshysynyń aıtýynsha, atalǵan fakti boıynsha qazirgi ýaqytta epıdemıologııalyq tekserý júrgizilip jatyr.
Qazir ınfektsııalyq statsıonarda jalpy 122 adam emdelip jatyr. 89 naýqastyń jaı-kúıi – qanaǵattanarlyq, 8 adamda – aýyr, 25 eresek adamda (1 oblystyq) – aýyrlyqtyń ortasha dárijesinde dep baǵalanyp otyr. Emdelýshiler arasynda 3 júkti áıel bar.
Barlyǵy 49 adam: 47 eresek jáne 2 bala saýyǵyp shyqsa, 2 adam qaıtys boldy.
Provızorlyq ortalyqtarda 186 adam bar, onyń ishinde 10-y bala, karantındik oqshaýlaýda – 426 adam, úı karantıninde 6199 adam otyr.
