Almatyda koronavırýstyń jańa tolqynymen kúrestiń biryńǵaı jospary ázirlenbek
ALMATY. QazAqparat – Almaty ákimi Baqytjan Saǵyntaev koronavırýstyń jańa tolqyny kezinde biryńǵaı jalpyqalalyq is-qımyl josparyn ázirlemek, dep habarlaıdy QazAqparat tilshisi.
Bul týraly ákim Twitter paraqshasynda jazdy.
«Іskerlik keńeste aǵymdaǵy epıdjaǵdaıdy jáne onyń qala ekonomıkasyna áserin talqyladyq. KVI-diń jańa tolqyny kezinde biryńǵaı jalpyqalalyq is-qımyl josparyn ázirlemekpiz. Karantındik shekteýler men bıznesti qoldaý sharalaryn barynsha teńdestirý qajet», - dedi ákim jazbasynda.
Keshe qala ákimi tikeleı efır arqyly qaladaǵy epıd ahýal týraly baıandaǵan bolatyn.
«Ótken aıdaǵy kórsetkishtermen salystyrǵanda anaǵurlym tómendegeni anyq. Epıdemııanyń qaýyrt sátterinde kúnine 250 adam tirkelgen bolatyn. Al jazylǵandar sany 13 360 adam. Pnevmonııamen 705 adam tirkelgen. Qazir kúnine 11 adam tirkeledi. Bul jaǵynan da kórsetkishter tómendegen», - dedi B.Saǵyntaev.
Onyń aıtýynsha, arnaıy bazadan 180 myń kásipkerlik sýbekti tirkeýden ótken. Qala ákimi ońtústik astananyń burynǵy ekonomıkalyq bıigine keler jyly shyǵatynyn boljady.
