Almatyda koronavırýstyń kúndelikti ósimi 3,8 paıyzǵa deıin tómendedi
ALMATY. QazAqparat – Almatyda kúndelikti ósim kórsetkishi 2% bolǵanda karantın sharalary jeńildetiledi. Bul týraly qalanyń bas sanıtar dárigeri Jandarbek Bekshın aıtty, dep habarlaıdy QazAqparat tilshisi.
«Tamaqtaný salasyndaǵy shaǵyn jáne orta bıznes sýbektilerine qatysty karantın talaptary saqtalady. Dámhanalar, ashanalar, meıramhanalar tek úıge jetkizý qaǵıdasymen jumys isteıdi. Jalpy alǵanda, karantın sharalary epıdemıologııalyq ahýalǵa baılanysty qalyptasady. Eger koronavırýs ınfektsııasynyń kúndelikti ósimi 2%-ǵa jetse, karantın sharalary jeńildeıdi. Al qazir qalada sońǵy 7 kúnde ósim 3,8 % bolyp otyr», - dedi Jandarbek Bekshın.
Onyń aıtýynsha, saýda oıyn saýyq ortalyqtary ázirge jabyq bolady.
Aıta keteıik, sáýirdiń sońǵy onkúndiginde ósim kórsetkishi 6% bolǵan edi.
