Almatyda koronavırýstyń barlyq oshaǵy oqshaýlandy
ALMATY. QazAqparat – Almatyda koronavırýstyń barlyq oshaǵy oqshaýlandy. Bul týraly Almaty qalasynyń memlekettik bas sanıtarlyq dárigeri Jandarbek Bekshın brıfıng barysynda aıtty, dep habarlaıdy QazAqparat tilshisi.
«Almatyda qazirgi ýaqytta 1353 jaǵdaı tirkeldi. Sáýir aıynda koronavırýstyq ınfektsııanyń juqtyrý deńgeıi táýligine 6%-dan aspaǵandyqtan, qalada kásiporyndar men mekemeler kezeń-kezeńmen iske qosylyp jatyr. Karantınnen shyǵý úshin Almatyda indet juqtyrǵandardy belsendi anyqtaý maqsatynda jappaı testileý bastaldy»,– dedi Jandarbek Bekshın.
Onyń aıtýynsha, qaladaǵy patsıentterdiń naqty sany megapolıs turǵyndarynyń jalpy sanynyń 0,06% quraıdy.
«Halyqty keńinen qamtý aýrýdyń sımptomsyz jaǵdaılaryn jáne juqtyrý oshaǵynyń aımaǵyn anyqtaýǵa múmkindik beredi. Búgingi tańda barlyq oshaqtar oqshaýlandy. Onyń ishinde Ortalyq qalalyq klınıkalyq aýrýhana da bar. Infektsııanyń tizbegin úzý úshin kúsheıtilgen sanıtarlyq-epıdemıologııalyq sharalar júrgizilýde «, - deıdi qalanyń bas sanıtar dárigeri.
