Almatyda koronavırýstyń aldyn alý jumystary qalaı júrgizilýde
ALMATY. QazAqparat– Almaty halyqaralyq áýejaıynda qala ákimi Baqytjan Saǵyntaevtyń tapsyrmasymen qurylǵan koronavırýstyń aldyn alý jónindegi óńirlik shtabtyń otyrysy ótti, dep habarlaıdy QazAqparat tilshisi.
Jıynda shahardyń aǵymdaǵy epıdemıologııalyq jaǵdaıy men ushyp keletin halyqaralyq reısterdi baqylaý úshin júrgiziletin sanıtarlyq-karantındik sharalardyń barysy pysyqtaldy.
1 aqpannan bastap medıtsına qyzmetkerleriniń jáne ýákiletti mamandardyń kómegimen megapolıstiń halyqaralyq áýejaıyna keletin barlyq halyqaralyq reısterge tekserý júrgizilýde. Áýejaı aýmaǵynda táýligine 30-dan astam epıdemıolog jumys isteıdi. Sondaı-aq laýazymdy tulǵalardyń ózara is-qımyl algorıtmi temirjol stansalarynda, avtomobıl ótkelderinde de saqtalǵan. Qalanyń medıtsınalyq uıymdary koronavırýstyq ınfektsııany baqylaý men onyń aldyn alý úshin kúsheıtilgen sharalardy júzege asyrady.
Ulttyq saraptama ortalyǵy bazasynda 200-den astam jaǵyndy synama zertteldi. Olardyń eshbirinde koronavırýs anyqtalmady. Sonymen qatar, megapolıste 100 myńnan astam medıtsınalyq betperde men 700-den astam dári-dármek qory bar. Jalpy qalada barlyq qajetti qorǵanys quraldary tolyqtaı jetkilikti. Sondaı-aq sanıtarlyq-aǵartý jumystary kúsheıtilip, saýda úıleri men bazarlarda sanıtarlyq baqylaý sharalarynyń saqtalýyna tekserý júrgizilýde. Aqparattyq-túsindirý jumystary aıasynda koronavırýstyq ınfektsııanyń aldyn alý boıynsha 18 myńǵa jýyq jadynama taratyldy.
Mamandar qala turǵyndarynan densaýlyqtaryna erekshe nazar aýdaryp, ınfektsııanyń aldyn alý sharalaryn saqtaýdy suraıdy:
• dene qyzýyn kúnine keminde 2 ret ólsheý;
• úı-jaılardy kúnine keminde 2 ret jeldetý;
• ylǵaldy tazalyq jumystaryn kún saıyn júrgizý;
• qoldy sabynmen jıi jýý;
• jeke ydys, jeke gıgıena quraldaryn (súlgi, sabyn, tis pastasy, ustara aspaptary jáne t. b.) paıdalaný.
Sondaı-aq JRVI men tumaýdy juqtyrý qaýpi joǵary kezeńde, birqatar elderde vırýstyq ınfektsııalardyń taralýy boıynsha jaǵdaıdy eskere otyryp, shahar turǵyndaryna adam kóp jınalatyn jerden aýlaq bolýǵa, qaýipti aımaqtarǵa shyqpaýǵa keńes beriledi.
Dene qyzýy bar adamdardyń qoǵamdyq oryndarǵa barmaı, der kezinde medıtsınalyq kómekke júginý, sondaı-aq jedel respıratorlyq ınfektsııasynyń belgileri bar jandardyń «jótelý ádebin» saqtaǵandary abzal.
Qazaqstan aýmaǵynda koronavırýs máseleleri jóninde táýlik boıy 1406 nómiri boıynsha biryńǵaı call-ortalyq jumys isteıdi. Kúdik týǵyzǵan jáne medıtsınalyq kómektiń tapshylyǵy oryn alǵan jaǵdaıda habarlasýǵa bolady.
