Almatyda koronavırýsty qaıta juqtyrǵan 10 naýqas tirkeldi
ALMATY. QazAqparat - Megapolıste koronavırýsty qaıta juqtyrý derekteri tirkelýde. Bul týraly onlaın brıfıng barysynda Almaty qalasy sanıtarııalyq-epıdemıologııalyq baqylaý departamenti basshysynyń orynbasary Ásel Qalyqova aıtty, dep habarlaıdy QazAqparat tilshisi.
Onyń aıtýynsha, Almatyda vırýsty qaıta juqtyrýdyń 10 jaǵdaıy tirkeldi. Olarda byltyrǵy jyldyń jazynda koronavırýs ınfektsııasy sımptomsyz ótken. Endi klınıkalyq belgimen ótip jatyr.
«Bul jaǵdaı boıynsha málimetter biryńǵaı statıstıkalyq esepke alynady», - dedi Ásel Qalyqova.
Sonymen qatar ol aldaǵy ýaqytta qaladaǵy saýda úıleri men bazarda halyqqa vaktsına salý jumysy qalaı júrgiziletinin aıtty.
«Qazir halyqty vaktsınatsııalaý boıynsha qalanyń bas memlekettik sanıtar dárigeriniń qaýlysy ázirlenip jatyr. Onda vaktsına salýdyń algorıtmi belgilenedi. Vaktsına saldyrýǵa kelgen adamda ózimen birge jeke kýáligi nemese pasporty bolý kerek. Al 21 kún ótken soń ol adam alǵash vaktsına saldyrǵan emhanasyna nemese ýaqytsha ekpe salý ornyna qaıta barý kerek», - deıdi ol.
