Almatyda koronavırýsty eń kóp adamǵa juqtyrǵan 7 naýqas belgili boldy
ALMATY. QazAqparat – Almatyda 7 adam koronavırýs ınfektsııasyn eń kóp adamǵa juqtyrǵan. Bul týraly onlaın brıfıng barysynda qalalyq Taýarlar men qyzmetterdiń sapasy men qaýipsizdigin baqylaý departamentiniń basshysy Aızat Moldaqasymova aıtty, dep habarlaıdy QazAqparat tilshisi.
Onyń aıtýynsha, júrgizilgen taldaýlarǵa sáıkes Almatyda 7 adamda KVI patogendi-agressıvti formasy anyqtalǵan.
«Olar eń kóp adamǵa juqtyrǵan. Kópshiliginiń aýrýy orta dárejede. Al qalǵany jeńil formada ótip jatyr. Sonymen qatar almatylyqtar arasynda sımptomy bilinbeı ótip jatqandar da bolýy múmkin. Sol úshin qazir qaladaǵy barlyq JRVI, tumaý, ókpeniń qabynýymen túsken naýqastardyń barlyǵyn koronavırýs ınfektsııasyna tekserip jatyrmyz. Eresekter arasynda osyndaı 1 jaǵdaı tirkeldi. Pnevmonııamen túsken adamnan ınfektsııa tabyldy. Keshe 13 bala tekserildi. Onyń 5-inde taldaý rastalmady. Qalǵany áli tekserilip jatyr. 5 naýqastyń 3-inde koronavırýs ınfektsııasy aýyrǵan adamdardan juqqan bolsa, eki adamnyń aýrýdy qalaı juqtyrǵany belgisiz bolyp otyr», - dedi Aızat Moldaqasymova.
Departament basshysy qala turǵyndaryna belgilengen 14 kún karantındi sabyrmen ótkizýge shaqyrdy.
«Ne úshin biz 14 kún dep alamyz? Sebebi bul ınfektsııanyń ınkýbatsııalyq kezeńine sáıkes keledi. Bizde bir naýqas boldy. 14 kún karantınde jatqanda test únemi vırýs joqtyǵyn kórsetip kelip, 12-táýlikte bir-aq kórinis bergen. Sondyqtan, 14 kún shydaý kerek», - dedi A.Moldaqasymova.
