Almatyda koronavırýsty anyqtaıtyn 20 zerthana bar
ALMATY. QazAqparat – Almatyda koronavırýsty anyqtaıtyn 20 zerthana bar. Bul týraly onlaın brıfıng barysynda qalalyq sanıtarııalyq-epıdemıologııalyq baqylaý departamentiniń basshysy, qalanyń bas memlekettik sanıtar dárigeri Jandarbek Bekshın aıtty, dep habarlaıdy QazAqparat tilshisi.
«Ótken jyly bizde 4 zerthana boldy, olardyń qýattylyǵy 3 myńǵa da jetpeıtin. Qazir biz koronavırýsty anyqtaıtyn 20 zerthanany iske qostyq. PTR zerthanalar qýattylyǵy táýligine 14 500 test. Ótken aptada bir táýlikte 8 600 zerthanalyq tekserý júrgizildi. Zerthanalar tolyq daıyn», - deıdi Jandarbek Bekshın.
Sonymen qatar, ol zerthanalar jumysy baqylaýda ekenin aıtty.
«Eń bastysy qajetti materıaldarmen jabdyqtalǵan. Qazir testiler men reaktıvter sany jetkilikti. Byltyrǵy oqıǵadan sabaq aldyq. Aıta keteıin, ákimdik tarapynan kóptegen qoldaýǵa ıe boldyq. Materıaldyq kómek kórsetilip jatyr», - deıdi ol.
Aıta keteıik, Almaty 10 naýryzdan beri «qyzyl» aımaqta . Ótken táýlikte megapolıste koronavırýs juqtyrǵan adamdardyń sany 545-ke jetti.
