Almatyda koronavırýstan kóz jumǵan 75 jastaǵy zeınetkerdiń basqa da aýrýlary bolǵan
ALMATY. QazAqparat – Almatyda koronavırýs ınfektsııasynan kóz jumǵan segizinshi adam týraly málimetter jarııalandy, dep habarlaıdy QazAqparat tilshisi.
Qalalyq qoǵamdyq densaýlyq saqtaý basqarmasynyń habarlaýynsha, megopolıste koronavırýs ınfektsııasyn juqtyrǵan taǵy bir patsıent qaıtys boldy.
Ol - 1945 jyly týǵan er adam.
«Naýqas 12 sáýirde Covid-19 dıagnozymen ınfektsııalyq statsıonarǵa emdeýge jatqyzylǵan bolatyn. JIA, arterııalyq gıpertonııa, aldyńǵy mı arterııasynyń anevrızmi, sozylmaly pıelonefrıt, ekijaqty pnevmonııa sııaqty qosymsha aýrýlary bolǵan» dep habarlady basqarmadan.
Qaıtys bolǵan adam dıagnostıkalaý jáne emdeý hattamasy boıynsha koronavırýs ınfektsııasynan em alǵan. Statsıonarda óte aýyr jaǵdaıda ókpeni jasandy jeldetý apparatyna qosylǵan.
Bul - Almatydaǵy koronavırýstan bolǵan 8-shi ólim. Buǵan deıin búgin tańerteń 1957 jylǵy áıel kóz jumǵan edi.
