Almatyda koronavırýstan qaıtys bolǵan er adamnyń basqa da sozylmaly aýrýlary bolǵan
ALMATY. QazAqparat– Almatyda koronavırýs ınfektsııasynan qaıtys bolǵan 68 jastaǵy er adamnyń basqa da sozylmaly aýrýlary bolǵan. Bul týraly Almaty qalalyq Qoǵamdyq densaýlyq saqtaý basqarmasy málim etti, dep habarlaıdy QazAqparat tilshisi.
«Patsıent uzaq ýaqyt boıy aýyr sozylmaly aýrýlarmen (vırýstyq gepatıt, qant dıabeti, arterııalyq gıpertenzııa, jalǵyz búırektiń sozylmaly pıelonefrıti, sozylmaly búırek jetkiliksizdigi, júrektiń ıshemııalyq aýrýy) aýyrǵan 1 toptaǵy múgedek bolǵan. Jedel shuǵyl medıtsınalyq kómek aýrýhanasyna naýqas aýyr hálde kelip túsken»,– dep habarlady vedomstvadan.
Almaty qalalyq Qoǵamdyq densaýlyq saqtaý basqarmasynyń málimetinshe, naýqas provızorlyq gospıtalda tekserýden ótken. PTR test COVID-19 dıagnozyn rastaǵan soń ınfektsııalyq statsıonarǵa aýystyrylǵan.
Patsıentke ınfektsııalyq statsıonarda COVID-19 dıagnostıkalaý jáne emdeý hattamasyna sáıkes qarqyndy terapııa júrgizildi. Júrgizilgen emge qaramastan, jaı-kúıi údemeli túrde nasharlap, ókpeni jasandy jeldetý apparatynda boldy.
Qazirgi ýaqytta Almatyda koronavırýstyq ınfektsııany juqtyrýdyń rastalǵan 1392 jaǵdaıy tirkeldi.
Statsıonarlarynda búgingi kúni 1156 patsıent em qabyldap jatyr.
Sondaı– aq, Almaty qalasy boıynsha 17 adam koronavırýstyq ınfektsııadan saýyǵyp úılerine shyǵaryldy. Olardyń ishinde Ortalyq qalalyq klınıkalyq aýrýhananyń 8 medıtsına qyzmetkeri, Balalar qalalyq juqpaly aýrýlar aýrýhanasynyń 2 qyzmetkeri jáne 7-ýi vırýs juqtyrǵan naýqaspen baılanysta bolǵandar.
