Almatyda koronavırýspen kúreske qansha qarjy bólindi
2020 jyly Almatyǵa COVID-19-pen kúreske respýblıkalyq bıýdjetten 21,6 mlrd teńge bólindi. Al jergilikti bıýdjetten 89,4 mlrd teńge qarastyryldy. Jalpy 100 mlrd astam teńge jumsaldy.
«Bul qarajat juqpaly aýrýlar aýrýhanalarynyń qurylysyna, medıtsınalyq jabdyq satyp alýǵa, medıtsınalyq uıymdardy dári-dármekpen qamtamasyz etýge, jedel járdem kóligin, jeke qorǵaný quraldaryn, tamaq ónimderin satyp alýǵa, ótemaqy tólemderine, azyq-túlik jáne dári-dármek turaqtandyrý qoryna, sonymen qatar, qalany aýqymdy dezınfektsııalaýǵa jumsaldy»,–dedi Almaty qalasynyń ákimi Baqytjan Saǵyntaev.
Aıta keteıik, Almatydaǵy alǵashqy jańa modýldi aýrýhana sáýir aıynda paıdalanýǵa berilgen bolatyn.
Onyń aýmaǵy 5850 sharshy metr,gospıtal bir mezette 280 naýqas qabyldaı alady. Qarqyndy terapııa bólimine 28 oryn bólingen. Munda 28 ókpeni jeldetý apparaty bar. Jobaǵa sáıkes, munda 281 oryndyq palata, 3 oryndyq palatalar, zerthana bólmesi, KT jáne rentgen, bronhoskopııa, ÝZD apparaty bólimi bar. 10 bir oryndyq palatanyń esigi syrttan. Ár boks jeldetý júıesimen qamtyldy. Bokstarda teris qysym jasaý arqyly batsıllalardyń dálizderge taralýyna kedergi jasalady. Jyldam turǵyzylatyn ǵımarat 9 baldyq jer silkinisine tótep bere alady.
Al 300 tósek-orynǵa arnalǵan ekinshi modýldi ınfektsııalyq aýrýhananyń qurylysy tamyz aıynda bastalyp, 1 qazanda aıaqtaldy.
Ol «Aport» saýda oıyn-saýyq ortalyǵynyń janynda ornalasqan jáne qalalyq klınıkalyq ınfektsııalyq balalar aýrýhanasynyń fılıaly sanalady. Gospıtal 12 bloktan turady, onyń ishinde 8 palatalyq bólim bar. Onda 300 tósek-oryn jáne 30 reanımatsııa palatasy bar. Barlyq tósekter medıtsınalyq gazben jáne ókpeni jasandy jeldetý apparatyna qosylǵan.
Aýrýhana zamanaýı KT, rentgen, ýltradybystyq apparattarmen jabdyqtalǵan, sondaı-aq koronavırýsqa arnalǵan PTR dıagnostıkasyn qosqanda zertteýdiń barlyq túrleri júrgiziletin óz zerthanasy bar.
«Ár blok jeke jumys isteıdi. Adamdar palatada oqshaýlana alady. Soǵan barynsha múmkindik jasalǵan. Palata 2-3 adamǵa arnalǵan. Jýynatyn bólme,kir jýatyn oryn men ashana bólek. Aldynǵy modýldi aýrýhanalarda bular qarastyrylmaǵan. Sonymen qatar, aýrýhanada ottegi stantsııasy bar», - deıdi Almaty qalalyq balalar juqpaly aýrýlar aýrýhanasynyń bas dárigeri Erjan Seralın.
Sonymen qatar,Almatyda dári-dármekter men medıtsınalyq mańyzy bar buıymdar boıynsha turaqtandyrý qory qurylǵan bolatyn. Oǵan jergilikti bıýdjetten 10 mlrd teńge mólsherinde qarajat bólindi, bul 2021 jyldyń aqpanyna deıin ónimniń 69 ataýynyń qajetti qoryn qalyptastyrýǵa múmkindik beredi.
Atalǵan qordyń basty maqsaty - áleýmettik suranysqa ıe dári-dármekpen jeke dárihanalar men statsıonarlardy qamtamasyz etý.
«Turaqtandyrý qorynyń sheńberinde statsıonarlyq emdeý nysandaryn qamtamasyz etý úshin medıtsınalyq quraldardyń jalpy qory belgilegen tarıfter boıynsha 5 mlrd teńge qarastyryldy, onyń 2,9 mlrd teńgesi juqpaly aýrýlar jáne provızorlyq statsıonarlar, 893 mln teńgesi – emhana jelisi úshin preparattar satyp alýǵa joldanatyn bolady. Qalǵan 1,2 mlrd teńgege medıtsına qyzmetkerleri jáne basqa da asa kóp suranysqa ıe statsıonarlyq preparattar úshin jeke qorǵanys quraldarynyń qorlary qalyptastyrylatyn bolady», - dedi Almaty qalalyq kásipkerlik jáne ınvestıtsııalar basqarma basshysynyń orynbasary Qarlyǵash Ábdijabbarova.
