Almatyda koronavırýspen kúreske qansha qarajat bólindi

ALMATY. QazAqparat – Almatyda búgin qalalyq qoǵamdyq densaýlyq saqtaý basqarmasynyń basshysy Tileýhan Ábildaev pen qalalyq taýarlar men qyzmetterdiń sapasy men qaýipsizdigin baqylaý departamenti basshysynyń orynbasary Ásel Halyqova brıfıng ótkizdi, dep habarlaıdy Qazaqparat tilshisi.

Tileýhan Ábildaevtyń aıtýynsha, Almatyda epıdahýaldy retteý maqsatynda respýblıkalyq bıýdjetten 73,5 mln teńge bólingen.

«Bul qarajat maska, dárilik zattardy, qorǵanys quraldaryn satyp alýǵa jumsalady. Odan bólek, qalalyq bıýdjetten 94.5 mln teńge qarjy bólindi. Al naýqastardy emdeý aqysy MÁMS qorynan qarastyrylady»,- dedi Tileýhan Ábildaev.

Basqarma basshysynyń aıtýynsha, qalada qajetti dári dármek pen zararsyzdandyrý quraldary jetkilikti.

Eske sala ketsek, buǵan deıin densaýlyq saqtaý mınıstri Eljan Birtanov Qazaqstannyń eki azamatynan koronavırýs ınfektsııasy tabylǵanyn málim etken edi. Keıinirek Nur-Sultanda taǵy bir áıeldiń qaterli indetti juqtyrǵany anyqtaldy.