Almatyda koronavırýspen kúreske qansha aqsha bólingen
ALMATY. QazAqparat – Almatyda koronavırýs ınfektsııasymen kúreske kezeń-kezeńimen aqsha bólingen. Bul týraly onlaın brıfıng barysynda qalalyq Qoǵamdyq densaýlyqty saqtaý basqarmasynyń basshysy Tileýhan Ábildaev aıtty, dep habarlaıdy QazAqparat tilshisi.
Onyń aıtýynsha, Almatydaǵy medıtsına salasyna kezeń-kezeńimen qarajat bólingen.
«Birinshi transh – Úkimet rezervinen 73,5 mln teńge bólingen bolatyn. Bul qarajatqa medıtsına qyzmetkerlerine jeke qorǵanys quraldary men naýqastardy emdeý úshin dári-dármek satylyp alyndy. Odan keıin 94,5 mln teńge ákimdik tarapynan bólindi. Bul qarajatqa jeke qorǵanys quraldary, dezınfektsııalaý quraldary satylyp alyndy. Úshinshi ret 1 mlrd 300 mln teńge bólindi. Bul qarajat jeke qorǵanys quraldary men zararsyzdandyrý quraldaryn, antıseptık, dári-dármek satyp alýǵa jumsaldy», - dedi basqarma basshysy Tileýhan Ábildaev.
