Almatyda koronavırýspen kúreske 60 mlrd teńge bólingen
ALMATY. QazAqparat – Almaty ákimdigi qarajat boıynsha basty basymdyqty COVID-19- ben kúreske jumsap, qalǵan barlyq shyǵyndardy qysqartpaq. Bul týraly qala ákimi Baqytjan Saǵyntaev «Almaty» telearnasynda ótken Akimat Live baǵdarlamasynyń tikeleı efırindegi suraqtarǵa jaýap berý kezinde aıtty, dep habarlaıdy QazAqparat tilshisi.
Qala ákimi birinshi kezekte koronavırýsqa qarsy kúres ekenin aıtty. Osyǵan baılanysty bıýdjettiń barlyq basym emes shyǵyndary qysqaryp, qarajat COVID-19 qarsy sharalarǵa baǵyttalady.
Onyń aıtýynsha, buryn josparlanǵan qurylys jobalaryn kelesi jylǵa qaldyrýǵa bolady.
«Pandemııa bastalǵannan keıin biz birden barlyq basqa jobalardy toqtattyq. Kelesi jylǵa deıin pandemııa sozylmaıdy dep úmittenemiz. Kelesi jyly jeńil bolady jáne biz josparlanǵan qurylys jobalaryn qaıta jandandyramyz», - dedi ákim.
Sondaı-aq ol sporttyq-mádenı is-sharalar toqtatylǵanyn atap ótti.
Almatyda koronavırýspen kúreske bıyl naýryzdan bastap shamamen 60 mlrd teńge bólindi. Onyń ishinde Úkimet tarapynan 11,5 mlrd teńge bólindi.
Bul qarajat áleýmettik mańyzy bar azyq-túlik taýarlaryna baǵany turaqtandyrýǵa, jeke qorǵanys quraldaryn satyp alýǵa, kireberisterdi, aýla aýmaqtaryn jáne kóshelerdi dezınfektsııalaýǵa jumsaldy.
Sonymen qatar, 16 shildede máslıhat bıylǵy qalalyq bıýdjetti naqtylaý týraly qaýly qabyldaǵan bolatyn.
Onyń aıasynda KVI-men kúresýge 30 mıllıard teńgeden astam qarjy bólindi. Onyń ishinde koronavırýsty emdeıtin gospıtalderdi dárimen qamtamasyz etý úshin rezervtik qorlar qurýǵa jáne farmatsevtıkalyq kompanııalarǵa paıyzsyz nesıe berýge baǵyttalǵan. Sondaı-aq «Halyq Arena» bazasynda jumys istep turǵan jáne qurylyp jatqan statsıonarlar, OQKA reanımatsııasy, klınıkalyq-dıagnostıkalyq zerthana jáne juqpaly aýrýlar aýrýhanasy úshin medıtsınalyq jabdyqtar satyp alýǵa qarajat bólindi.
