Almatyda koronavırýspen kúreske 14 mlrd teńge jumsaldy
ALMATY. QazAqparat- Almatyda koronavırýspen kúreske 14 mlrd teńge jumsaldy. Bul týraly «Medıtsınalyq saqtandyrý qory» KEAQ Almaty qalalyq fılıaly málim etti, dep habarlaıy QazAqparat tilshisi.
Qordyń málimetinshe, medıtsınalyq saqtandyrý qory arqyly koronavırýs pen pnevmonııaǵa qarsy kúreske 71,6 mlrd teńgeden astam qarajat qarastyrylǵan. Bıylǵy jyldyń birinshi toqsanynda Almaty qalasy boıynsha indetke qarsy kúres sharalaryna 14,9 mlrd teńge jumsaldy.
«Koronavırýs pen pnevmonııa juqtyrǵan jaǵdaıda patsıentterge medıtsınalyq kómek saqtandyrylǵan-saqtandyrylmaǵanyna qaramastan kórsetiledi. Sondaı-aq, COVID-19 belgileri baıqalǵan nemese atalǵan vırýsqa shaldyqty degen kúdik keltirilgen azamattar mobıldi brıgadalar men úıdegi statsıonar qyzmetine júgine alady»,-dep habarlady qordaǵylar.
Jyl basynan beri Almaty qalasynda koronavırýs ınfektsııasyna qarsy kúreske bólingen 14,9 mlrd teńgeniń:
- 7,8 mlrd teńge – medıtsına qyzmetkerlerine ústemaqyǵa;
- 5,5 mlrd teńge – KVI boıynsha kórsetilgen medıtsınalyq kómekke jáne indettiń taralýyna jol bermeýge baǵyttalǵan is-sharalarǵa (karantındik jáne ınfektsııalyq statsıonarlarda em qabyldaý – 25 myń jaǵdaı);
- 1,3 mlrd teńge – PTsR-dıagnostıkaǵa (168 myń PTsR test jasaldy);
- 253,1 mlrd teńge – mobıldi brıgadalar qyzmetine (mobıldi brıgadalar 44,1 myń qyzmet kórsetken);
- 7,4 mln teńge – úıdegi statsıonar qyzmetine (1390 patsıentke qyzmet kórsetilgen) jumsalǵan.
«Medıtsınalyq saqtandyrý qory» KEAQ Almaty qalalyq fılıaly dırektorynyń orynbasary Janar Kenjebaevanyń aıtýynsha, KVI-ge bólingen bıýdjettiń negizgi bóligi koronavırýsqa qarsy kúreske jumyldyrylǵan medıtsına qyzmetkerlerine qosymsha aqy tóleýge jumsaldy.
«Jalpy alǵanda, qańtar aıynda 4987 medqyzmetkerge 1,8 mlrd teńge, aqpan aıynda 5365 mamanǵa 1,9 mlrd teńge qosymsha aqy tólendi. Naýryz aıynda 7202 qyzmetker 2,7 mlrd teńge ústemaqy aldy»,- deıdi Janar Kenjebaeva.
