Almatyda koronavırýspen kúreske 100 mlrd teńgeden astam qarajat bólindi

ALMATY. QazAqparat - Almatyda COVID-19-ben kúresý úshin 100 mlrd teńgeden astam qarjy bólindi. Bul týraly Almaty qalasynyń ákimi Baqytjan Saǵyntaev málim etti, dep habarlaıdy QazAqparat tilshisi.

«2020 jyly Almatyǵa COVID-19-pen kúreske respýblıkalyq bıýdjetten 21,6 mlrd teńge bólindi. Al jergilikti bıýdjetten 89,4 mlrd teńge qarastyryldy. Jalpy 100 mlrd astam teńge jumsaldy. Shyǵyndar osy jyldyń sońyna deıingi ekinshi tolqyndy eskere otyryp josparlanyp otyr», - dedi Almaty ákimi ákimi Baqytjan Saǵyntaev Ortalyq kommýnıkatsııalar qyzmetinde ótken brıfıng barysynda.

Ákimniń aıtýynsha, bul qarajat juqpaly aýrýlar aýrýhanalarynyń qurylysyna, medıtsınalyq jabdyq satyp alýǵa, medıtsınalyq uıymdardy dári-dármekpen qamtamasyz etýge, jedel járdem kóligin, jeke qorǵaný quraldaryn, tamaq ónimderin satyp alýǵa, ótemaqy tólemderine, azyq-túlik jáne dári-dármek turaqtandyrý qoryna, sonymen qatar, qalany aýqymdy dezınfektsııalaýǵa jumsaldy.