Almatyda koronavırýspen kúresip júrgen dárigerlerge ústemaqy tólene bastady
ALMATY. QazAqparat – Almatyda koronavırýspen kúresip júrgen dárigerlerge ústemaqy tólene bastady. Bul týraly Almaty qalasy Qoǵamdyq densaýlyq saqtaý basqarmasynyń basshysy Tileýhan Ábildaev brıfıng barysynda aıtty, dep habarlaıdy QazAqparat tilshisi.
«500-den astam dáriger, 1 700 astam orta medıtsına qyzmetkeri, 549 kishi medıtsına qyzmetkeri jáne 764 ózge de densaýlyq saqtaý qyzmetkeri tólemderdi alýda. Jalpy alǵanda, 965 mln teńge kólemindegi ústemaqyny 3 557 medıtsına qyzmetkeri alady», - dedi Tileýhan Ábildaev.
Sondaı-aq, ol esepteý 3 sanat boıynsha júrgiziletinin atap ótti. Balalar juqpaly aýrýlar aýrýhanasynyń medıtsına qyzmetkerleri birinshi sanat boıynsha tólem alatyn boldy.
Buǵan deıin, Almatydaǵy balalar juqpaly aýrýlar aýrýhanasynyń qabyldaý bóliminiń dárigerleri ústemaqyǵa qatysty shaǵymdanǵan bolatyn. Kóp uzamaı olardyń shaǵymyna QR Densaýlyq saqtaý mınıstri Eljan Birtanov jaýap berdi.
