Almatyda koronavırýspen aýyrǵandarǵa psıhologııalyq qoldaý kórsetilip jatyr
ALMATY. QazAqparat - Almatyda Psıhıkalyq densaýlyq ortalyǵynyń bazasynda bir aı buryn ınfektsııalyq statsıonar ashyldy. Onyń jumysy týraly ortalyq dırektory Sapar Rahmensheev Óńirlik kommýnıkatsııalar qyzmetiniń brıfınginde aıtty, dep habarlaıdy QazAqparat tilshisi.
Sapar Rahmensheevtiń aıtýynsha, Ortalyq bazasyndaǵy kovıdtik statsıonar jumys istep turǵan kezeńde aýrý aǵymynyń túrli dárejesimen 864 naýqas tústi, 435 naýqas shyqty, 8 adam qaıtys boldy.
Ol aýyr dárejeli barlyq naýqastarǵa koronavırýs ınfektsııasyna qarsy ekpe salynbaǵanyn atap ótti.
«Qazirgi ýaqytta biz bárimizde belgisizdik, kúızelis jáne COVID-19 ınfektsııasynyń qaýpi týraly alańdaýshylyq bar. Koronavırýs ınfektsııanyń taralýy búginde ýshyǵyp tur, jańa shtammdar, «tolqyndar» paıda bolyp jatyr», - deıdi Sapar Rahmensheev.
Almaty Psıhıkalyq Densaýlyq ortalyǵynyń dırektory qazirgi jaǵdaıǵa baılanysty turǵyndar arasynda úreıge jol bermeý óte mańyzdy ekenin atap ótti.
Maman karantındik shekteýler keıbir adamdardyń emotsıonaldy jaǵdaıyna keri áser etetinin de tilge tıek etti
«Biz koronavırýs ınfektsııasyna shaldyqqan naýqastardyń estý qabiletiniń nasharlaǵanyn, tez ashýlanatynyn, úreılenetinin, tipti agressııany baıqaımyz. Munyń bári olarǵa dert kezinde durys tynys almaýy saldaryna bolǵan psıhıkalyq aýytqýshylyq. Biraq, munyń bári ýaqytsha qubylystar. Emdelip shyqqan soń bizdiń mamandar patsıenttermen dári-dármektersiz, senim telefony arqyly jumys jasaıdy», - deıdi spıker.
Sonymen qatar, ol dálelsiz aqparatqa senbeýge shaqyrdy.
«Árıne, adamdar aqparat alýlary kerek, biraq jergilikti densaýlyq saqtaý organdary sııaqty senimdi kózderden alynǵan aqparatqa júginý kerek. Jalǵan aqparatqa senbegen abzal», - dep qosty ol.
Ol almatylyqtardan ózin-ózi emdemeýdi, biraq suraqtar týyndaǵan jaǵdaıda Telemedıtsına ortalyǵynyń telefonyna habarlasýdy ótindi.
Búginde 11 632 naýqasty dárigerler qashyqtan baqylaýǵa aldy.
