Almatyda koronavırýspen aýyrǵandardyń 97 paıyzy syrttan juqtyryp kelgen
ALMATY. QazAqparat – Almatyda koronavırýs ınfektsııasy rastalǵandardyń 97 paıyzy syrttan juqtyryp kelgen. Bul týraly búgin onlaın brıfıng barysynda qalalyq taýarlar men qyzmetterdiń sapasy men qaýipsizdigin baqylaý departamentiniń basshysy Aızat Moldaqasymova aıtty, dep habarlaıdy QazAqparat tilshisi.
Almaty qalasynyń bas sanıtar dárigeriniń aıtýynsha, koronavırýsqa shaldyqqandardyń 3 paıyzy ǵana Qazaqstanda juqtyrǵan.
«Osy ýaqyt aralyǵynda 13 naýryzdan bastap aýrýdyń órshýi 3 ret baıqalǵan. 5-shi kúni - táýligine 9 adam, 15-shi kúni - 16 adam, 18-shi kúni - 10 adam tirkelgen. Taldaý nátıjelerine sáıkes 73 adamnyń 97 paıyzy syrttan juqtyryp kelgeni anyqtaldy. Basqa elden kelgen 26 adam kelesi kúni 45 adamǵa juqtyrǵan. Almatyda bolǵan 2 adamnyń baılanysta bolǵan adamdary sanaýly ǵana», - dedi ol.
Qalalyq bas sanıtar dáriger ınfektsııa kóbine qaı elderden kelgenin aıtty.
«Aýyrǵandardyń 40% - Máskeýden, 23% - Berlın-Almaty reısinen, 20% - Sankt Peterbýrg-Almaty reısinen, 17% - Mınsk-Almaty reısimen kelgender», - dedi ol.
Onyń aıtýynsha, aýyrǵandar jas ereksheligine qaraı toptastyrylǵan. Olardyń kópshiligi - 30-39 jas aralyǵynda, odan keıingileri - 20-29 jas aralyǵynda, úshinshi topqa 50-59 jastaǵy adamdar kiredi.
Almatyda koronavırýs juqtyrǵandardyń 62,5% - áıelder, 37,5% - erler.
