Almatyda koronavırýspen aýyratyndar sanynyń ósýi maýsymdyq jaǵdaılarǵa da baılanysty – ınfektsıonıst
Almaty koronavırýs ınfektsııa boıynsha «sary aımaqta» qalyp otyr. Búgingi tańda Almatyda koronavırýs ınfektsııanyń 18 939 jaǵdaıy tirkelgen, olardyń ishinde 17 309-y saýyǵyp, 389-y qaıtys boldy. Sońǵy táýlikte KVI-dan 265 adam saýyǵyp shyqty.
Almaty qalasy Qoǵamdyq densaýlyq saqtaý basqarmasynyń málimetinshe, 5 qańtardaǵy jaǵdaı boıynsha 665 adam statsıonarlyq em qabyldap jatyr, onyń ishinde 30 bala bar. 548 naýqastyń jaǵdaıy ortasha aýyr, 100 adam aýyr jáne 17 adam óte aýyr jaǵdaıda. Jansaqtaý bóliminde 60 naýqas bar, 9 adam – ÓJJ apparatynda. Búginde tósek qorynyń 67,6% - y bos.
Sońǵy 10 kúnde qalada koronavırýstyń jańa sımptomsyz jaǵdaılaryn tirkeýdiń ósý dınamıkasy jańa jaǵdaılardyń kúndelikti tirkelýin kórsetedi. Ótken táýlikte 34 adam baqylaýǵa alyndy. Ósim 0,3% qurady.
Almaty qalasy Qoǵamdyq densaýlyq saqtaý basqarmasynyń shtattan tys bas ınfektsıonısti, «I.Jekenova atyndaǵy qalalyq klınıkalyq juqpaly aýrýlar aýrýhanasy» ShJQ MKK dáriger-sarapshysy Tamara Ýtaganova megapolıstegi syrqattanýshylyq jaǵdaıyna túsinik berdi.
«Uzaq demalystan keıin, ádette, JRVI jáne tumaý aýrýynyń statıstıkasy artady. Vırýstyq ınfektsııanyń ınkýbatsııalyq kezeńi - 2 apta. Táýelsizdik merekesinen keıin, jańa jylǵa deıin 14 kún ótti. Sonymen qatar, KVI-men aýyrǵandar sanynyń ósýi maýsymdyq jaǵdaılarmen de baılanysty, qazir JRVI men tumaýmen syrqattanýshylyqtyń eń joǵary kórsetkishterge jetken kezi, sýyq tıip, tumaýǵa shaldyǵýshylardyń kóbeıýi aýa raıyna baılanysty, qazir Almatyda qatty aıaz tur», - dep atap ótti ol.
Tamara Ýtaganova emdeý algorıtmin saqtaýdyń jáne ózin-ózi emdeýmen aınalyspaýdyń mańyzdylyǵyn erekshe atap ótti jáne negizgi usynystarmen bólisti.
«Aýrý belgileri paıda bolǵan kezde – dene qyzýynyń kóterilýi, murynnyń bitelýi, tamaqtyń aýyrýy, úı karantınin saqtap, turǵylyqty jeri boıynsha emhanaǵa medıtsınalyq kómekke júginý qajet. Dene qyzýy joǵarylap, qatty bas aýrýy mazalap, júrek aıný jáne qusý, entigý paıda bolǵan kezde jedel járdem shaqyrý kerek. Eshbir jaǵdaıda óz-ózin emdeýmen aınalysýǵa bolmaıdy», - dedi T.Ýtaganova.
Búgingi tańda koronavırýsty juqtyrý qaýpi bar. Osyǵan baılanysty Almaty ákimdigi qala turǵyndary men qonaqtaryn barlyq saqtyq sharalaryn saqtaýǵa shaqyrady. Áleýmettik qashyqtyqty saqtaýǵa beı-jaı qaramaı, betperde kııý jáne múmkindiginshe adamdar kóp jınalatyn jerlerge barýdan aýlaq bolýy kerek, bul ásirese 65 jastan asqan adamdarǵa qatysty.
