Almatyda koronavırýsqa júrgiziletin test sany artady
ALMATY. QazAqparat - Almatyda koronavırýsqa júrgizilip jatqan testter sany kúnine 2,5-3 myńǵa jetkiziletin bolady. Bul týraly Almaty qalasynyń memlekettik bas sanıtarlyq dárigeri Jandarbek Bekshın aıtty, dep habarlaıdy QazAqparat tilshisi.
Onyń aıtýynsha, koronavırýsty anyqtaý boıynsha osy ýaqytqa deıin 46 myń test alynyp, zerthanada taldaý jasaldy.
«Qazirgi ýaqytta kúnine 2 myńdaı test júrgizilýde, bul kórsetkishti 2,5-3 myńǵa deıin jetkizýdi kózdep otyrmyz. Synamalardyń nátıjesi bir kún ishinde daıyn bolady. Osy aralyqta 11 myńdaı medıtsına qyzmetkerinen test alyndy. Sonymen qatar, medıtsına qyzmetkerleriniń koronavırýsty juqtyryp almaýyna baǵyttalǵan erejeler men talaptar da kúsheıtilip otyr»,– dedi Jandarbek Bekshın.
Sonymen qatar, ol Almatyda 6 zerthana PTR dıagnostıkasy boıynsha jumys isteıtinin atap ótti.
