Almatyda koronavırýsqa shaldyqqan áıel Tsıýrıhten ushyp kelgen
ALMATY. QazAqparat - Almaty qalalyq taýarlar men qyzmetterdiń sapasy men qaýipsizdigin baqylaý departamenti basshysy Aızat Moldaqasymova onlaın brıfıng barysynda koronavırýs ınfektsııasy boıynsha epıdemıologııalyq ahýal týraly aqparat taratty, dep habarlaıdy QazAqparat tilshisi.
Onyń aıtýynsha, qazir Almatyda ınfektsııa juqtyrǵan 31 adam bar.
«Qazir Almatyda KVI tabylǵan 15 oshaq anyqtaldy. Bul kórsetkish kún saıyn ózgerip otyrady. Jańadan tirkelgen 2 jaǵdaı boıynsha aıta keteıik. Onyń biri aýyrǵan qyz balamen jaqyn qatynasta bolǵan. Ekinshisi áıel adam Tsıýrıh qalasynan ushyp kelgen. Áýejaıdan birden taksımen úıine jetip, jalǵa alǵan páterinde oqshaýlanǵan. Bul oshaq túgel zararsyzdandyryldy. Týystarmen baılanys bolmaǵan. Alǵashqy belgileri shyǵa bastaǵanda emhanaǵa habarlasqan. Test nátıjesi vırýs bar ekenin kórsetti», - dedi Aızat Moldaqasymova.
Onyń aıtýynsha, adamdar koronavırýs juqpasyn jaqyn qatynas kezinde juqtyrýy yqtımal. Máselen adam eger naýqaspen 15 mınýt boıy 2 metrden jaqyn qashyqta sóılesetin bolsa juqtyrýy múmkin.
«Joǵaryda aıtylǵan turǵyndar jaqyn qatynastaǵy adamdarǵa jatpaıdy. Olar tek qaýip joǵary jerde turatyndar sanalady. Olardyń barlyǵy qazir úı karantıninde oqshaýlanǵan. Jaǵdaıyn medıtsına mamandary telefon arqyly baqylaýda ustap otyr», - dedi departament basshysy.
Munyń aldynda Almatyda 15 aýrý oshaǵy anyqtalǵanyn habarlaǵan bolatynbyz.
Atapaıtqanda, Alataý aýdanynda - 2 oshaq: «Zarıa Vostoka» shaǵyn aıdany, Sary-oı kóshesi, 234; «Akkent» shaǵyn aýdany, 7. Almaly aýdanynda - 4 oshaq: Jeltoqsan, 125; Baıtursynov, 78/1; Jarokov, 16; Jarokov, 7. Medeý aýdanynda - 3 oshaq: Zenkov, 59; Dostyq, 162; Gogol, 75. Jetisý aýdanynda - 2 oshaq: Eńlikgúl, 34a; Volochaevskaıa, 51. Túrksib aýdanynda - 4 oshaq: «Altaı-1» shaǵyn aýdany, 8; «Jas Qanat» shaǵynaýdany, 86, Maılın kóshesi, 77; Spasskaıa kóshesi, 63 mekenjaılarynan aýrý tabyldy.
Sondaı-aq, qala ákimi Baqytjan Saǵyntaev QR Prezıdentiniń Tótenshe jaǵdaı jónindegi memlekettik komıssııa jıynynda bergen tapsyrmalaryn júzege asyrý jóninde jol kartasy jasalatynyn aıtty.
Atap aıtqanda, Eńbek jáne halyqty áleýmettik qorǵaý mınıstrligi tótenshe jaǵdaı kezinde eńbekaqydan aıyrylǵan adamdarǵa 1 AÁK (42 500 teńge) kóleminde aılyq tólem júrgizý máselesi pysyqtalmaq. Kópbalaly otbasylarǵa, múgedekter men halyqtyń áleýmettik osal toptaryna tegin azyq-túlik pen turmystyq jıyntyq taratylmaq.
Búgin Qazaqstanda koronavırýs juqtyrǵandardyń sany 79-ǵa jetti.
