Almatyda koronavırýsqa qatysty ahýal turaqtaldy
ALMATY. QazAqparat – Almatyda epıdemıologııalyq ahýal turaqtalyp keledi. Bul týraly «Ákimdik Live» baǵdarlamasynda qala ákimi Baqytjan Saǵyntaev aıtty, dep habarlaıdy QazAqparat tilshisi.
Ýaqytynda ótkizilgen profılaktıkalyq sharalardan soń qalada koronavırýs jaǵdaıy azaıǵany baıqalady.
Qala boıynsha búginde 14 233 naýqas tirkelgen. Qalada 8 adamda KVI dıagnozy rastalǵan.
«Ótken aıdaǵy kórsetkishtermen salystyrǵanda anaǵurlym tómendegeni anyq. Epıdemııanyń qaýyrt sátterinde kúnine 250 adam tirkelgen bolatyn. Al jazylǵandar sany 13 360 adam. Pnevmonııamen 705 adam tirkelgen. Qazir kúnine 11 adam tirkeledi. Bul jaǵynan da kórsetkishter tómendegen», - dedi B.Saǵyntaev.
Odan bólek, qaladaǵy statsıonarlyq ortalyqtardyń qanshalyqty jumys istep turǵanyn tilge tıek etti.
«Qazir ınfektsııalyq statsıonarlar 18 paıyzǵa istep tur. 3673 tósek oryn rezervte tur. ıAǵnı, qazir tósek-oryndardyń 82 paıyzy bos tur. Jańa aýrýhanalardyń qurylysy qazanda aıaqtalaryn eskersek, biz bul kórsetkishti 7 myńǵa jetkizemiz. Búginde 39 adam jansaqtaý bóliminde jatyr. 314 patsıent ambýlatorııalyq em qabyldap jatyr», - dedi ákim.
Alaıda, ol vırýs eshqaıda ketpegenin, saqtyq sharalaryn saqtaý kerektigin túsindirdi.
«Eger biz áleýmettik qashyqtyqty saqtamasaq, maskalyq rejımdi buzsaq, burynǵy qalpymyzǵa kelýimiz múmkin», -dedi ákim.
