Almatyda qoronavırýsqa qatysty ahýal turaqtaldy – ákim
ALMATY. QazAqparat – 5 shildede karantın sharalaryn kúsheıtý nátıjesinde qalada epıdemıologııalyq ahýal birshama turaqtaldy. Bul týraly Almaty telearnasynda ótken tikeleı efır barysynda qala ákimi Baqytjan Saǵyntaev aıtty, dep habarlaıdy QazAqparat tilshisi.
Saǵyntaevtyń aıtýynsha, № 4 jáne №7 qalalyq aýrýhanalar burynǵy jumys baǵytyna kóshti.
Basqa nysandar óz jumysyna kezeń-kezeńimen aýysady.
Onyń aıtýynsha, kúzde vırýstyń ekinshi tolqyny bastalǵan jaǵdaıda barlyq statsıonarlar KVI gospıtaline aýystyrý jospary jasaldy.
«Kúninde 200 adam aýrýhanaǵa jatqyzylǵan jaǵdaıda biz KVI gospıtalderin iske qosa bastaımyz. Bizde aýrýdyń sharyqtaý sheginde 500 asa adamdy jatqyzǵan ýaqyt boldy. Bul densaýlyq saqtaý júıesine úlken aýyrlyq keltiredi. Josparǵa sáıkes statsıonarlar 2-3 kún ishinde KVI aýrýhanasy bolyp shyǵýǵa daıyn bolýy tıis», - dedi Saǵyntaev.
Sonymen qatar, birinshi medıtsınalyq sanıtarlyq kómek kórsetetin emhana qyzmetkerleriniń de jumysy kúsheıtiledi. Ýchaskelik dárigerler qaýip tobyna kiretin adamdardy esepke alýy kerek.
Saýalnama jaýaptaryna sáıkes KVI aýyrǵan naýqastardyń 55%-y úıinde emdelgen, 31% - jekemenshik emhanalarǵa júgingen, 14% — tirkelgen emhanalarǵa qaralǵan.
«Soǵan sáıkes biz KVI juqtyrǵan adam qalaı emdeleti týraly jadnama jasap jatyrmyz. Ambýlatorııalyq túrde emdeletin patsıentterdi dári dármekpen tolyq qamtımyz. Ol úshin 5 mlrd teńgege turaqtandyrý qory jasalǵan», - dedi qala ákimi.
