Almatyda koronavırýsqa qatysty 45 myń test ótkizildi
ALMATY. QazAqparat – Almaty qalasynyń ákimi Baqytjan Saǵyntaevtyń tapsyrmasy boıynsha shahar basshysynyń orynbasary Erjan Babaqumarov beınekezdesý rejıminde zerthana basshylarymen jumys keńesin ótkizdi, dep habarlaıdy QazAqparat tilshisi.
Almatyda COVID-19 test alatyn alty iri zerthana bar. Olar Ulttyq saraptama ortalyǵy, sanıtarlyq-epıdemıologııalyq saraptama jáne monıtorıng ǵylymı-praktıkalyq ortalyǵy, M. Aıqymbaev atyndaǵy qazaq asa qaýipti ınfektsııalar ulttyq ǵylymı ortalyǵy, Ortalyq referens-zerthana, sondaı-aq Qazaqstan-Koreı klınıkasy men «Olımp» KDZ.
Keńes barysynda, qala ákiminiń orynbasary zertteý materıalyn alýmen aınalysatyn medıtsınalyq brıgadalardyń eńbek qaýipsizdigin qamtamasyz etý kerektigin erekshe atap ótti. Sonymen birge, Taýarlar men qyzmetterdiń sapasy men qaýipsizdigin baqylaý departamenti jáne zerthanalardyń aqparattyq júıeler ıntegratsııasy arasynda jumysty ózara úılestirýdi kúsheıtý mindetterin belgiledi.
Budan ózge megapolıs turǵyndary úshin testileýdiń qoljetimdiligin, kórsetiletin qyzmetterdiń sapasy men jedeldigin, onyń ishinde nátıjelerdi usyný tártibi men merzimderin odan ári arttyrý máseleleri talqylandy.
«Bizdiń mindetimiz – testileý arqyly ınfektsııanyń jasyryn oshaqtaryn jedel jáne der kezinde anyqtaý, olardy ýaqytyly oqshaýlap, qaladaǵy epıdemıologııalyq ahýaldyń jaǵdaıyn odan ári baqylaýdy qamtamasyz etý», – dedi Erjan Babaqumarov.
Sondaı-aq, ol memlekettik jáne memlekettik emes zerthanalarǵa qalamen birlesip jasap jatqan jumystary úshin alǵysyn bildirdi.
Búginde Almatyda shamamen 45 myń test ótkizildi. Solardyń ishinde 29 myńy PTR test jáne 16 myńy ekpress-test.
