Almatyda koronavırýsqa qarsy jappaı vaktsınatsııa birneshe kúnge shekteledi
ALMATY. QazAqparat – Almatyda koronavırýsqa qarsy vaktsınatsııa birneshe kúnge shekteledi. Bul týraly onlaın brıfıng barysynda qalalyq qoǵamdyq densaýlyq saqtaý basqarmasynyń bastyǵy Narıman Tabynbaev málim etti, dep habarlaıdy QazAqparat tilshisi.
«Eki kún ishinde Almaty qalasynyń 17 myńnan asa turǵynyna vaktsına salyndy. Aýrýhanalardan bólek, Asia Park saýda oıyn-saýyq ortalyǵy men Respýblıka saraıynda vaktsınatsııa júrgizildi. Búgin kem degende 10 000 adamǵa vaktsına salynady dep oılaımyn. 3-4 kúnde vaktsınanyń jańa partııasy keledi. Jańa partııa jetkizilgenge deıin vaktsınatsııany shekteý qajet bolady. Qalǵanyn tek Densaýlyq saqtaý mınıstrligi usynǵan adamdar kontıngentine salýǵa tyrysamyz. Erteń ekpe jasalady, biraq sońǵy eki kúndegideı emes, shekteýli mólsherde», - dedi ol.
Narıman Tabynbaev almatylyqtardy alańdamaýǵa shaqyryp, sáýirde vaktsına jetkilikti bolatynyn aıtty.
«Sáýir aıynda vaktsına jetkilikti bolady dep oılaımyn. Biz vaktsınatsııany tek medıtsınalyq mekemelerde ǵana emes, halyqty keńinen qamtý úshin daıyndalǵan vaktsınatsııa pýnkterinde de jasaý kerektigin túsindik. Biz erteń vaktsınatsııa jasaımyz, biraq shekteýli mólsherde. Osy eki kúndegideı aýqymda emes», - dedi qalalyq qoǵamdyq densaýlyq saqtaý basqarmasynyń bastyǵy.
