Almatyda koronavırýsqa qarsy jappaı vaktsınatsııa 9 sáýirden keıin bastalady
ALMATY. QazAqparat - Vaktsına alýǵa ótinish bildirgen almatylyqtardy QR Densaýlyq saqtaý mınıstrliginen vaktsınalar dozasynyń jańa partııasy alynǵannan keıin kezekke sáıkes vaktsınalaıdy. Bul týraly qalalyq qoǵamdyq densaýlyq saqtaý basqarmasynyń ókili Laýra Myrzaǵalı onlaın brıfıng barysynda málim etti, dep habarlaıdy QazAqparat tilshisi.
«Qazir qaladaǵy emhanalar vaktsına saldyrýǵa nıetti barlyq kelýshilerdi tirkeýge alyp, kezekke qoıyp jatyr. Búginde Almatyǵa 34 900 doza jetkizildi. Biz áli de basym topqa vaktsına egýdemiz. Atap aıtar bolsaq, polıtsııa qyzmetkerleri, muǵalimder, dárigerler, múgedektermen jumys jasaıtyn áleýmettik qyzmetkerler. Halyq kóp jınalyp, uzyn-sonar kezek paıda bolmas úshin men emhanalardan aldyn ala kezekke jazylyp alýlaryn suradym. Biraq bizde jappaı vaktsınatsııalaý 9 sáýirden keıin bastalady», - dedi spıker.
Bıylǵy jyldyń 1 aqpany men 5 sáýiri aralyǵynda 44 315 adamǵa ekpe salyndy. Onyń 6 200-i vaktsınanyń eki komponentin de alǵan.
«2-5 sáýir aralyǵynda 28 413 azamat vaktsına aldy. Ótken táýlikte 4 764 adam ekpe saldyrdy. 6 335 doza vaktsına qaldy, vaktsınatsııalaý barysy jalǵasýda. 9 sáýirde vaktsınanyń besinshi transhy kútilýde, Almatyǵa taǵy 57 445 doza jetkiziledi. Osy jyldyń 13 mamyrynda 57 445 doza jetkizý jospary bar»,- deıdi Laýra Myrzaǵalı.
Vedomstvo ókili búginde ınfektsııalyq statsıonarlarda 5610 tósek-oryn bolsa, 3114-inde naýqastar jatqanyn atap ótti. Onyń 87-si balalar, olardyń jaǵdaıyn dárigerler jeńil jáne ortasha jaǵdaıda dep baǵalaýda. 77 eresek adamnyń jaǵdaıy asa aýyr, 570 adam aýyr jaǵdaıda jáne 2467 naýqastyń jaǵdaıy ortasha aýyrlyq deńgeıinde.
