Almatyda koronavırýsqa qarsy vaktsına saldyrýdyń algorıtmi túsindirildi
ALMATY. QazAqparat - «Respýblıkalyq elektrondyq densaýlyq saqtaý ortalyǵy» ShJQ RMK Almaty qalalyq fılıalynyń dırektory Gúlnar Ysqaqova onlaın brıfıng barysynda koronavırýske qarsy vaktsına saldyrýdyń algorıtmin túsindirdi, dep habarlaıdy QazAqparat tilshisi.
Onyń aıtýynsha, Almaty turǵyndary medıtsınalyq uıymda tirkeýde turǵanyna qaramastan úıine jaqyn jerdegi vaktsına egý oryndaryna baryp ekpe saldyra alady. Qazir qalada 56 uıymda ekpe salý jumysy júrgizilýde, ol jerde josparly jáne jedel ekpe salý kabınetteri uıymdastyrylǵan.
«Josparly degenimiz elektrondy úkimet portaly arqyly tirkelip kelgender. Eger vaktsına saldyrǵyńyz kelse polıklınıkaǵa baryp, qaıda saldyramyn dep izdeýdiń qajeti joq. Tek Egov portalyna kirip aldyn ala jazylsańyz bolǵany. Keıin emhana qyzmetkerleri belgili bir ýaqytty sizge arnaıdy, ol sms habarlama bolyp keledi. Sonda kórsetilgen ýaqytpen baryp ekpeni saldyra alasyz», - deıdi ol.
Al elektrondy úkimet portalyna tirkele almaıtyn azamattar úshin emhana men basqa da ekpe salý oryndarynda jedel vaktsınalaý oryndary qurylǵan. Bul ásirese smartfon ustamaıtyn nemese belgili bir sebeptermen portalǵa kirip tirkele almaıtyn adamdarǵa arnalǵan. Eger aldyn ala jazylmaǵan bolsańyz úı mańyndaǵy bazarlar men saýda oryndaryndaǵy ekpe salý ornyna baryp vaktsına saldyra alasyz. Alaıda qolyńyzda jeke kýáligińiz bolýy kerek.
Spıkerdiń sózinshe, vaktsınanyń birinshi komponentin saldyrǵan soń qaıta tirkelýdiń qajeti joq. Óıtkeni vaktsına alǵany týraly sol jerde tirkeledi jáne 21 kúnnen keıin qaı kezde jáne qaı jerge kelip vaktsınanyń ekinshi komponentin saldyrý týraly habarlama keledi.
